Исмайил телевалди, нур бәкриләр хитай пәнләр академийиси билән мәслиһәт елиш келишими имзалиған

Уйғур аптоном районлиқ һөкүмәтниң тор бетидин мәлум болушичә, аптоном район рәиси исмайил теливалди, партком муавин секритари нур бәкриләр 3 ‏- айниң 16 ‏-күни бейҗиңда, хитай пәнләр академийисиниң партийә гуруппа башлиқи лу йоңшаң билән мәслиһәт елиш келишими имзалиған, бу келишимниң нами "пән-техника һәмкарлиқ келишими" дәп аталған. Бу келишимниң мәзмуни уйғур аптоном райониниң тәбиий байлиқлирини ечиш -тәрәққий қилдуруштики һәл қилғуч мәсилиләрдә хитай пәнләр академийисидин мәслиһәт елиш, униң көрсәтмиси буйичә иш қилиштин ибарәт. Келишим буйичә, буниңдин кейин уйғур аптоном раюни хитай пәнләр академийисиниң уйғур юртлирида тәтқиқат мәркизи қуруш, тәҗрибихана қуруш, нефит , кан санаитини тәрәққи қилдуруш, деһқанчилиқ, чарвичилиқ, бағвәнчилик, орманчилиқ саһәлиридә йәрлик алаһидә мәһсулатларни ишләпчиқириш қатарлиқ техника паалийәтлири үчүн асанлиқ яритип беридикән.

Хитай коммунист партийиисниң уйғур аптоном райониға бәлгилигән әмәлдари ваң лечуән бу келишимни "шинҗаңни пән -техника билән гүлләндүрүш" келишими дәп атиған вә бу келишим аптоном райониниң 11 ‏- бәш йиллиқ пиланидики көрсәткүчләрни орунлишини илгири сүриду, дегән.

Чәтәлләрдә туруватқан уйғурлар исмайил теливалди билән нур бәкрини хитай һөкүмитиниң уйғур хәлқини "үч хил күчләр" дегән бәднам билән бастуруши вә уйғурхәлқиниң мәдәнийәт әнәнисини хитайлаштуруши үчүн хизмәт көрситиватқан әрбаблар дәп қарап кәлмәктә. (Вәли)