Qeshqer hökümet da'iriliri xitaygha yötkigen Uyghur déhqan emgek küchlirini kemsitti

4 - April chüshtin burun qeshqer wilayetlik partkom hem hökümet da'iriliri "qeshqerdin xitay ölkilerge ewetilgen ishchilarning yétekchi kadirliri" yighinini achti. Yighinda qeshqerning 8 nahiyisini asas qilip sirtlargha yötkelgen Uyghur déhqan emgek küchining ötken bir yilda jemi 560 ming adem qétimgha yetkenliki toghruluq doklat bérilgen. Hemde xitay ölkilirge orunlashturulghan ishchilargha yétekchi qilip ewetken bir qisim kadirlarni mukapatlighan.

Qeshqer wilayitining mu'awin walisi jowli, "qeshqerdiki Uyghur déhqan emgek küchlirini xitay ölkilirige yötkesh bir ulugh wezipe, biz Uyghur déhqanlirini azghine térilghu yéridin azat qilishimiz kérek, ular qeshqerdin, shinjangdin sirtlargha yüzlinishi, nezer da'irisini échishi kérek, özining milliy éngi bilen idiyiwi inqilap qilip, köz qarashlirini özgertishi kérek " dégen.

Yighinda xitay kadirlar yene xitay ölkilirige yötkigen Uyghur yashlirining xizmet hem turmush we idiyisidiki özgirishliri heqqide toxtilip "Uyghur ishchilar xitay ölkilirige bashta kelgende taziliqqa diqqet qilmaytti, yuyunushnimu yaxshi körmeytti, kadirlar ulargha künde xizmet ishlep uzun'gha barmay ular yaman turmush adetlirini özgertti" dégendek kemsitish sözlirini qilghan.

Xitay hökümiti Uyghur déhqan emgek küchlirini xitay ölkilirige yötkesh déhqanlarning kirimi ashurushni, nezer da'irisini ashurushni meqset qilghan dep teshwiq qiliwatqan bolsimu, emma erzan emgek heqqi bilen mejburi xitay ölkilirige yallanma ishchiliqqa élip kétilgen qizlarning barghan jaylarda rohiy iqtisadi hemde jismaniy jehetlerdin éghir xorluqqa uchrawatqanliqi ashkarilanmaqta. (Gülchéhre)