Керийә наһийисидә яш‏- өсмүрләрниң идийисини тәкшүрүш һәрикити күчәйтилмәктә


2006.02.23
Share on WhatsApp
Share on WhatsApp

Керийә аммиви учур тор бети 23 ‏- январ күни, иттипақ әзалириниң иккинчи қетимлиқ илғарлиқ тәрбийисини күчәйтиш һәрикитини башливәткәнликини елан қилди.

Хитай һөкүмити, хотән вилайитиниң керийә наһийисидә " алтә яштин қириқ яшқичә" болған кишиләрниң идийивий әһвали үстидә кәң көләмдә тәкшүрүш елип бериш һәрикити қозғиған болуп, бу һәрикәт, яш - өсмүрләрниң қанунсиз диний паалийәтләргә қатнашқан‏- қатнашмиғанлиқини тәкшүрүшни асас қилған.

Дуня уйғур қурултийиниң баянатчиси дилшат ришит, бир қанчә күн илгири франсийә агентлиқи вә истансимизниң зияритини қобул қилип, керийә наһийисидә күчәйтилгән мәзкүр һәрикәтниң, шәрқий түркистанниң ай юлтузлуқ көк байриқини керийә наһийисгә тикләп қойғанлиқ вәқәси сәвәбидин мәйданға кәлгәнликини билдүргән иди.

Баянатчи дилшат ришит әпәндиниң ейтишичә, керийә сақчи даирилири, тәкшүрүш елип бериш давамида, байрақ тикләш вәқәси билән мунасивәтлик дәп 6 кишини қолға алған болуп, йәрлик хәлқ қорқуп кәткәнликтин бу вәқәни етирап қилиштин баш тартқан . Биз 22 ‏- феврал күни керийә сақчилириға телефун уруп, бу вәқә үстидә сүрүштүрүш елип бардуқ , сақчилардин ениқ бир җавап алалмиғандин кейин, керийә наһийисидики бир қанчә аилидин бу вәқәдин хәвири бар ‏- йоқлиқини соридуқ, уларниң һәммиси бу вәқәдин хәвири йоқ икәнликини билдүрди.

23 ‏- Феврал күни , йәнә бу һәқтә зияритимизни қобул қилған дилшат ришит, хитай һөкүмитиниң уйғур аптоном районида, кишиләрниң сөзләш әркинликини хитайниң өлкилиригә қариғанда һәссиләп чәкләйдиғанлиқини, сиясий мәсилиләрдә өз қарашлирини билдүргән уйғурларниң нәччә он йиллиқ қамақ җазасиға вә һәтта өлүм һөкүмигә дуч келидиғанлиқини тәкитлиди.

Хитай һөкүмити гәрчә, шәрқий түркистан мустәқилчилирини вәуларниң байрақлирини пүтүнләй йоқитивәткәнликини билдүрүватқан болсиму, керийә наһийисидә йүз бәргән бу вәқә, уйғурларниң өз дөләт байриқини сақлап келиватқанлиқини намайән қилған. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.