Uyghur aptonom rayonida mininggit késelliki bayqaldi

Uyghur aptonom rayonida bu yil 1 - aydin béri 9 kishi mininggit késelliki bilen yuqumlan'ghan. Aptonom rayonluq sehiye nazaritidiki da'irilerning ashkarilishiche, bimarlarning ichide mininggit késelliki bilen yuqumlan'ghanliqi éniqlan'ghan üch kishi doxturxanida yatquzulghan. Ikki kishi di'agnoz qoyush basquchida bolup, qalghan 4 kishi mininggit bilen yuqumlan'ghanliqi guman qiliniwatqan bimarlar iken.

Amma sehiye nazaritidiki da'iriler, mininggit késellirining qaysi rayonda bayqalghanliqini shundaqla bimarlarning hazirqi ehwalini tilgha almighan. Shinxu'a axbarat agéntliqining xewer qilishiche, ötken yili aptonom rayon boyiche 12 kishi mininggit késelliki bilen yuqumlan'ghan. Shu yili xitay boyiche 57 kishi mininggit bilen yuqumlan'ghan.

Uyghur aptonom rayonida mininggit késelliki 2 yashtin 15 yashqiche bolghan arliqtiki balilarda köp uchraydiken. Xitay hökümiti Uyghur aptonom rayonida 1980 - yillarning otturiliridin bashlap, balilarni mininggitke qarshi imunitlashqa bashlighan.

Sabiq sowét ittipaqi bi'o-ximiye alimlirining ashkarilishiche, 1980 - yillarning bashliri xitay xelq azadliq armiyisining korla etrapidiki bir mexpiy tejribixanisidin mininggit wirosi chiqip kétip, korla etrapida mininggit késellikining tarqilishini keltürüp chiqarghan.

Shinxu'a axbarat agéntliqining xewer qilishiche, sehiye nazariti mininggit késellikining tarqilish ehwalini diqqet bilen küzetmektiken. Amma Uyghur aptonom rayon boyiche ambarda zapas mininggit waksinisi qalmighan. (Erkin)