Уйғур елидә 800 миң оқуғучи пахта теришкә елип китилди


2006-09-06
Share

Йеңи оқуш мәвсүми башлинип узун өтмәйла, уйғур елидә 800 миң нәпәр оқуғучи уйғур елиниң һәр қайси җайлириға пахта теришкә әвәтилгән. Хәвәрдә бу оқуғучиларниң һәр милләт балилиридин болуп, мәктәпниң өз күчигә тайинип иқтисатчанлиқ билән мәктәп башқуруш әмгәк дәриси буйичә бу әмгәккә елип чиқилғанлиқи йезилған.

Тәңритағ хәвәр ториниң мәлум қилишичә, оқуғучиларниң бу қетимлиқ пахта териш әмгики 10‏-айниң 1‏- күнигичә давамлишидикән. Әмма хәвәрдә бу оқуғучиларниң башланғуч, оттура яки алий мәктәптинлиқи ениқ көрситилмигән. Лекин мунасивәтлик даириләр йеқинда, буниңдин кейин башланғуч мәктәп оқуғучилирини пахта теришкә елип чиқмайдиғанлиқини елан қилған иди. Шуңа бу оқуғучиларниң оттура-алий мәктәп оқуғучилири болуши мумкинлики пәрәз қилинмақта.

Оқуғучиларни мәҗбурий пахта теришкә елип чиқиш йәни еғир җисманий әмгәккә селиш, оқуғучилар вә ата-анилар арисида түрлүк наразилиқларни пәйда қилип кәлгән болуп, күндилик пахта териш вәзиписини ада қилип болалмиған оқуғучиларниң һәтта пул төләшкә мәҗбур болуши, иқтисади начаррақ аилиләр үчүн бир чоң бесим болмақта.

Бу һәқтә радиомизға келиватқан инкасларму аз әмәс. Йеқинда бизгә телефон қилған бир алий мәктәп оқуғучиси, мәктәп оқуғучиларниң пахта әмгикигә бәргән пулниң уларниң шу йәрдики йимәк-ичмикигә аран йетидиғанлиқини, әгәр бу оқуғучиларғиму худди ичкиридин кәлгән хитай ишләмчиләргә беридиған пулни бәрсә, у чағда бәлким бәзи оқуғучиларниң разилиқ билән бу әмгәкни қилиши мумкинликини билдүрди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт