Uyghur élide 800 ming oqughuchi paxta térishke élip kitildi


2006.09.06

Yéngi oqush mewsümi bashlinip uzun ötmeyla, Uyghur élide 800 ming neper oqughuchi Uyghur élining her qaysi jaylirigha paxta térishke ewetilgen. Xewerde bu oqughuchilarning her millet baliliridin bolup, mektepning öz küchige tayinip iqtisatchanliq bilen mektep bashqurush emgek derisi buyiche bu emgekke élip chiqilghanliqi yézilghan.

Tengritagh xewer torining melum qilishiche, oqughuchilarning bu qétimliq paxta térish emgiki 10‏-ayning 1‏- künigiche dawamlishidiken. Emma xewerde bu oqughuchilarning bashlan'ghuch, ottura yaki aliy mekteptinliqi éniq körsitilmigen. Lékin munasiwetlik da'iriler yéqinda, buningdin kéyin bashlan'ghuch mektep oqughuchilirini paxta térishke élip chiqmaydighanliqini élan qilghan idi. Shunga bu oqughuchilarning ottura-aliy mektep oqughuchiliri bolushi mumkinliki perez qilinmaqta.

Oqughuchilarni mejburiy paxta térishke élip chiqish yeni éghir jismaniy emgekke sélish, oqughuchilar we ata-anilar arisida türlük naraziliqlarni peyda qilip kelgen bolup, kündilik paxta térish wezipisini ada qilip bolalmighan oqughuchilarning hetta pul töleshke mejbur bolushi, iqtisadi nacharraq a'ililer üchün bir chong bésim bolmaqta.

Bu heqte radi'omizgha kéliwatqan inkaslarmu az emes. Yéqinda bizge téléfon qilghan bir aliy mektep oqughuchisi, mektep oqughuchilarning paxta emgikige bergen pulning ularning shu yerdiki yimek-ichmikige aran yétidighanliqini, eger bu oqughuchilarghimu xuddi ichkiridin kelgen xitay ishlemchilerge béridighan pulni berse, u chaghda belkim bezi oqughuchilarning raziliq bilen bu emgekni qilishi mumkinlikini bildürdi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.