Yawropa komitéti xitaygha Uyghurlarning weziyitidin "qattiq ensirewatqanliqini" bildürgen

Yawropa ittipaqi tashqi ishlar komissari benita férréro waldnér, Uyghurlarning hoquqi xitay - yawropa kishilik hoquqi söhbitide da'im otturigha qoyulup kéliwatqanliqini bildürdi.

Waldnér xanimning eskertishiche, Uyghurlarning weziyiti 2005 - yili öktebirde ötküzülgen xitay - yawropa kishilik hoquq söhbitide achquchluq mesile süpitide muzakire qilin'ghan. U, "bu muzakiridin burun yawropa ittipaqi ömikining Uyghur aptonom rayonida élip barghan 3 künlük ziyariti, yawropa ittipaqini ürümchi we aqsuda yerlik da'iriler we diniy rehberler bilen az sanliq milletler hoquqi toghrisida muzakire élip bérish pursiti bilen teminlidi" deydu.

Benita férréro waldnér, bu sözlerni yawropa parlaméntining italiyilik ezasi marko kappatoning yazma su'allirigha jawab bergende tekitligen. Waldnér xanim "xitaydiki az sanliq milletler hoquqi mesilisi aldimizda ötküzülidighan kishilik hoquq söhbitining küntertipidiki muhim mesile hésablinidu " dep körsetti.

Uning eskertishiche, yawropa ittipaqi rabiye qadirning perzentliri qolgha élin'ghanliqi we ten jazasigha uchrighanliqigha diqqet qilghan. U, bu mesilining bu yil 27 - iyunda xitay tashqiy ishlar ministirliqi bilen ötküzülgen bir söhbette otturigha qoyulghanliqini bildürdi.

Yawropa parlamént ezasi marko kappato, waldnér xanimgha yollighan yazma su'alida yawropa ittipaqining sherqiy türkistandiki az sanliq milletler hoquqi we rabiye qadir xanimning perzentlirini qutquzush yolida néme ishlarni qilghanliqini sorighan. (Erkin)