Xitay ölkiliridiki chong karxanilar Uyghur éligha makanliship iqtisadiy üstünlükke érishmekte


2007.04.05

Xitay hökümiti xitay ölkiliridiki bir türküm chong karxana we karxana guruhlirining, Uyghur élide makanliship, Uyghur élidiki ewzel bayliqni iqtisadiy üstünlükke aylandurush istratégiyisining yolgha qoyulush qedimini tézletmekte.

Xitay axbarat wastisining 5 ‏- april künidiki xewiridin ashkarilinishiche, 2005 ‏- yili shinxu'a guruhi, junggo ashliq guruhi we junggo ximiye sana'iti guruhi, junggo suchiliq guruhi qatarliq 4 chong karxana Uyghur éligha makanliship, Uyghur aptonom rayonidiki polat ‏- tömür, binakarliq qurulushi, ximiye sana'iti, suchiliq qatarliq kesiplirini échish qurulushigha qatnashqan. Bularning ichide shangxey bawshen polat - tömür guruhi shinjangda makanlashqandin kéyin, 3 milyard yü'en kapitalni royxetke aldurup, Uyghur élining polat - tömür ishlepchiqirish miqdarini 3 milyon tonnidin 6 milyon tonnigha yetküzmekchi bolghan. Junggo qurulush matériyalliri pen - téxnika sana'iti guruhi, qeshqerde künige bir ming 600 tonna sémont ishlepchiqirish iqtidarigha ige qurulushni yolgha qoyghan.

Buningdin sirt yene nurghun xitay karxana guruhliri bir türküm yéngi türler boyiche aldinqi basquchluq teyyarliq xizmetlirini ishleshke kiriship ketken.

Uyghur élide esli mewjut bolghan zawut - karxanilarni ishtin toxtatqanliqini inkas qilghan dunya Uyghur qurultiyining bayanatchisi dilshat réshit ependi, xitay hökümitining Uyghur élide Uyghur ishchi - xizmetchilerni asas qilghan hemde yerlik bashquridighan karxana, guruhlarning ornigha xitay karxanilirini dessitip, shularning menpe'etige payda yetküzüsh yolini tutuwatqanliqini, buning ashkara halda xitay milletchiliki siyasitini yolgha qoyush ikenlikini bildürdi. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.