Миңлиған чарвичилар байинбулақ яйлақлиридин көчүрүлмәкчи

Хитай һөкүмити бүгүн, уйғур елиниң байинғулин аптоном области тәвәликидики байинбулақ яйлақлирида йүз йиллардин бери чарвичилиқ билән шуғуллинип яшап келиватқан чарвичиларни көчүридиғанлиқини елан қилди.

Хитай даирилири бу җайда әвладму ‏- әвлад яшап келиватқан чарвичиларни көчүрүшкә, байинбулақ яйлиқидики аққу көли яйлақ екологийисиниң еғир дәриҗидә бузулғанлиқини сәвәб қилип көрсәткән.

Аққу көлини өз ичигә алған байинбулақ яйлиқи, деңиз йүзидин 2500метир егизликтики бипаян яйлақ болуп, уйғур ели шундақла хитай территорийисидики әң чоң тәбиий яйлақ һесаблиниду, нәччә он миңлиған моңғул һәмдә бир қисим қазақ, қирғиз чарвичилар бу яйлақни макан тутуп чарвичилиқ һаятини кәчүрүп кәлгән. Хитай һөкүмити кейинки үч йилғичә, 1400аилиликни аққу көли яйлақ районидин йираққа мәһәллә қуруп көчүрмәкчи икән.

Хитай даирилири чарвичиларни көчүрүш аққу көли муһитини түзәштә еһтияҗлиқ тәдбир болупла қалмай чарвичиларниң муқим олтурақ районида, чидамлиқ өйләрдә олтуруп намратлиқтин қутулушиға пайдилиқ иш дәп тәшвиқ қилмақта.

Әмма илгири мәзкур райондин мухбирлиримизниң игилигән мәлуматлириға қариғанда, йеқинқи йиллардин бери яйлақниң саяһәтчиләргә һәмдә мәбләғ салғучиларға кәңри ечивитилиши билән яйлақниң тәбий йепинчилири әслигә кәлтүргүсиз бузғунчилиққа учриған шундақла бу чарвичиларниң һаяти һәмдә чарвичилиқ ишләпчиқиришиғиму сәлбий тәсирләрни көрсәткән. (Гүлчеһрә)