Minglighan charwichilar bayinbulaq yaylaqliridin köchürülmekchi

• 
  2006-09-20

Xitay hökümiti bügün, Uyghur élining bayin'ghulin aptonom oblasti tewelikidiki bayinbulaq yaylaqlirida yüz yillardin béri charwichiliq bilen shughullinip yashap kéliwatqan charwichilarni köchüridighanliqini élan qildi.

Xitay da'iriliri bu jayda ewladmu ‏- ewlad yashap kéliwatqan charwichilarni köchürüshke, bayinbulaq yayliqidiki aqqu köli yaylaq ékologiyisining éghir derijide buzulghanliqini seweb qilip körsetken.

Aqqu kölini öz ichige alghan bayinbulaq yayliqi, déngiz yüzidin 2500métir égizliktiki bipayan yaylaq bolup, Uyghur éli shundaqla xitay térritoriyisidiki eng chong tebi'iy yaylaq hésablinidu, nechche on minglighan mongghul hemde bir qisim qazaq, qirghiz charwichilar bu yaylaqni makan tutup charwichiliq hayatini kechürüp kelgen. Xitay hökümiti kéyinki üch yilghiche, 1400a'ililikni aqqu köli yaylaq rayonidin yiraqqa mehelle qurup köchürmekchi iken.

Xitay da'iriliri charwichilarni köchürüsh aqqu köli muhitini tüzeshte éhtiyajliq tedbir bolupla qalmay charwichilarning muqim olturaq rayonida, chidamliq öylerde olturup namratliqtin qutulushigha paydiliq ish dep teshwiq qilmaqta.

Emma ilgiri mezkur rayondin muxbirlirimizning igiligen melumatlirigha qarighanda, yéqinqi yillardin béri yaylaqning sayahetchilerge hemde meblegh salghuchilargha kengri échiwitilishi bilen yaylaqning teb'iy yépinchiliri eslige keltürgüsiz buzghunchiliqqa uchrighan shundaqla bu charwichilarning hayati hemde charwichiliq ishlepchiqirishighimu selbiy tesirlerni körsetken. (Gülchéhre)