Lyudawan kömür kani taqilishi mumkin

Ürümchi shehirining sherqidiki liyudawan kömür kani heddidin ziyade qézip kolan'ghanliqtin, ürümchi shehirining yer asti qatlimida keng kölemde boshluq peyda bolup, ürümchi shehirining bixeterlikige éghir tehdid élip kelmekte.

Ürümchi sheherlik dölet bayliqini bashqurush idarisining bildürüshiche, ular bu sewebtin lyudawan kömür kanini taqash layihisini tetqiq qiliwatqan bolup, emma qachan taqaydighanliqini téxi békitmigen.

Ularning körsitishiche, lyudawan kömür kani ürümchi shehirige eng yéqin kömür kanlarning biri bolghachqa, kömür qézish netijiside, ürümchi shehirining yer asti qatlimida keng da'iride kawak shekillen'gen. Bezi jaylarda hetta chöküsh hadisisi körülgen. Hazir ürümchi shehiride chökken yerning kölimi nechche on kwadirat kilométir kélidighan bolup, chöküsh barghansiri sheher merkizige qarap kéngiyip, ürümchi sheherlik hökümetning binasigha az qalghan.

Buningdin sirt, kömür kolash netijiside yer asti qatlamlirida boshluqlarning peyda bolushi , ürümchining yer asti su menbeliri, yer yépinchiliri we yer sheklini éghir ziyan'gha uchratqan. Lyudawan kömür kanidin bashqa, ürümchi shehirining gherbidiki ishlepchiqirish qurulush armiyisining 101 - polkining qarmiqidiki kömür kanmu oxshash mesilini keltürüp chiqarghan.

Xitay da'iriliri lyudawan kömür kanini tedriji halda taqashni otturigha qoyghan. Emma kömür kanda ishlewatqan ishchilarni qandaq bir terep qilidighanliqini bildürmigen. Ürümchi liyudawan kömür kanida nurghun Uyghur kömür kan ishchiliri bar. (Arzu)