Шәндуң гиологийилик өлчәш идариси уйғур елидә йәнә бир чоң көмүрлүк тапти

Йеқинда шәндуң өлкисиниң гиологийилик өлчәш идариси уйғур елиниң санҗи областида йәнә бир чоң көмүрлүкни тапқан. Мөлчәрлинишичә, бу көмүрлүкниң запас миқдари 6 милярд тоннидин ашидикән. Бу шәндуң кан байлиқлирини қезиш орунлириниң уйғур елидә байқиған 2‏- чоң көмүрлүки болуп һесаблиниду.

Хитай хәвәр агентлиқиниң хәвәр қилишичә, бу көмүрлүкниң запас миқдари хитайниң 2005‏- йилидики омумий көмүр мәһсулат миқдариниң 3 һәссисигә тоғра келидикән. Өткән йили шәндуң кан байлиқи назарити уйғур елидә 1 милярд 390 милйон тонна запас миқдариға игә чоң көмүрлүк байқиған иди. Йеқинқи йиллардин буян , уйғур илидики хитай парткоминиң секритари ваң лечуәнниң юрти болған шәндуңниң гиологийә орунлири уйғур елидә йәр байлиқлирини қезиш ишлириға көп қатнишип кәлгән болуп, буниңдин сирт һазирму шәндуңдики нурғун карханиларниң уйғур елидә кан қезиш арзуси бар икән.

Хитай көмүр тәминатиға җиддий еһтияҗлиқ чоң дөләтләрниң бири. Әмма хитайниң көмөр кан ишләпчиқириш бихәтәрлик әһвали, хәлқара җамаәт әндишә қилидиған бир әһвал. Чүнки хитайда һәр йили кан һадисиси сәвәбидин өлүдиған ишчиларниң сани дуня бойичә биринчи орунда туруп кәлгән. Техи чаршәнбә күнила шәншидики бир көмүр канда партлаш йүз берип, 56 ишчи өлгән.

Буниңдин сирт, уйғур елиниң фукаң шәһиридә өткән йили йүз бәргән вә 83 кишиниң өлүшини кәлтүрүп чиқарған кан һадисисигә четишлиқ 6 нәпәр мәсул хадим үстидин чаршәнбә күни сот ечилип, уларға 3 йилдин 6 йилғичә қамақ җазаси берилди. (Пәридә)