Көмүр канларни һәддин зиядә қезиш сәвәбидин үрүмчи шәһириниң йәр асти қатлими чөкмәктә

Үрүмчи шәһириниң әтрапидики көмүр канларни кәң көләмдә қезиш нәтиҗисидә йәр қатлимида пәйда болған бошлуқ, үрүмчи шәһиригә тәһдит елип кәлмәктә.

Хитайниң шинхуа ториниң пәйшәнбә күни бәргән мәлуматлириға қариғанда,нәччә он йилдин боян үрүмчиниң йәр астидики көмүр байлиқи һәддидин зиядә қезилғанлиқтин, нөвәттә үрүмчиниң йәр асти қатлимида кәң даиридә бошлуқ пәйда болған.

Бәзи җайларда һәтта чөкүш һадисилири көрүлгән . Үрүмчи шәһәрлик хәлқ һөкүмитиниң йеңи салған бинасиға 700 метирчә келидиған җайда йәр чөкүп, бир чоң орәк пәйда болған. Нөвәттә көмүр колаш сәвәбидин келип чиққан йәр қатлиминиң чөкүши барғансери үрүмчи шәһәр мәркизигә қарап кеңийиватмақта икән.

Буниңдин сирт, көмүр канларни һәддидин зиядә ечиш нәтиҗисидә үрүмчиниң йәр асти сүйиму зор тәсиргә учриған. Хитай даирилири илгириму үрүмчиниң йәр астидики бошлуқниң кеңийиватқанлиқини билдүргән болсиму бирақ буни контрол қилидиған үнүмлүк тәдбир қолланмиған.(Арзу)