Кучардики мәшһур ислам өлимаси сидиқ қари һаҗим вапат болди


2007.08.10

Уйғур аптоном райониниң кучар наһийисидики мәшһур ислам өлимаси, муддәрис вә җамаәт әрбаби сидиқ қари һаҗим, җүмә күни юртида вапат болған. Хәвәрләргә қариғанда сидиқ қари һаҗим, җүмә күни чүштин кейин пешин билән әсир арилиқида вапат болған болуп, җиназа намизи шәнбә күни әтигәндә чүшүрүлмәкчи икән.

Райондики тор бәтләрдә чиққан бу һәқтики хәвәрләрдә мәрһумниң вапат болуш сәвәби тилға елинмиған болсиму, лекин мәрһумни йеқиндин тонуйдиған затлар, сидиқ қари һаҗимниң 90 яшларға йеқинлишип қалғанлиқини билдүрмәктә. Сидиқ қари һаҗимниң шөһрити униң фиқһий илимидики камиллиқи биләнла әмәс, диний мәктәп ечип талипларни тәрбийиләш, хитай даирилириниң диний сияситигә қарши өктичилики вә у йетиштүргән талипларниң исянкарлиқи билән мәшһурдур.

У кучарниң сақсах дегән җайида бир мәсчиткә имамәтчилик қилиш җәрянида бир мәдрис ачқан вә шу йәрдә хитай һөкүмити бу мәдрисни тақивәткичилик муддәрислик қилип, нурғун талипларни тәрбийилигән иди. У тәрбийилигән талиплар ичидики һимид талипни хитай һөкүмити 1994 -йили үрүмчидә хелил алтун вә мәмәт юнуслар қатарида өлүм җазаси берип етип ташлиған.

Кучарниң 4 - район қонас кәнтлик һәсән қари, сидиқ қари һаҗиниң барен инқилабидин кейин қолға елинған талиплиридин бири болуп, у түрмидә хитай сақчилар тәрипидин қейин қистақта өлтүрүлгән. Сидиқ қари һаҗиниң вапати, кучар наһийисидики деһқанларниң қизлирини ичкири өлкигә әвәтишкә нарази болуп, наһийилик һөкүмәткә әриз қилип барған вә бу вәқә хитайни алақзадә қиливәткән мәзгилгә тоғра кәлди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.