" Қәшқәр әдәбияти" журнилиниң муһәррири күрәш һүсәйин түрмидин қоюп берилидикән

Мәркизи америкиниң сан франсеско шәһиридики сөһбәт фонди җәмийитиниң җүмә күни ашкарилишичә, қәшқәр әдәбияти журнилиниң муһәррири күрәш һөсәйин уйғур аптоном райониниң маралбеши наһийисидики бир түрмидин шәнбә күни қоюп берилидикән. Сөһбәт фонди җәмийити, күрәш һүсәйинниң 3 йиллиқ қамақ җазасиниң муддити тошқанлиқи сәвәблик 2 ‏- феврал күни қоюп берилидиғанлиқини билдүрди.

Күрәш һөсәйин 2004 - йили қәшқәр әдәбияти журнилиниң муһәррири болуп хизмәт қилған мәзгилидә маралбешилиқ язғучи нурмуһәммәт ясинниң " ява кәптәр" намлиқ әсирини "қәшқәр әдәбияти" журнилида елан қилғанлиқи түпәйли хитай даирилири тәрипидин қолға елинип 3 йиллиқ қамақ җазасиға һөкүм қилинған. Лекин күрәш һүсәйинниң қоюп берилидиғанлиқи хитай даирилири тәрипидин техи испатланмиди. Әйни чағда даириләр "ява кәптәр"ниң аптори нурмуһәммәт ясинни әсиридә кишиләрни бөлгүнчиликкә вә зораванлиққа қутратқулуқ қилған, дегән җинайәтләр билән әйибләп 10 йиллиқ қамақ җазасиға һөкүм қилған.

Нөвәттә нурмәмәт турсун, үрүмчидики 1 ‏- түрмидә җаза муддитини өтимәктә. Алдинқи йили б д т кишилик һоқуқ комитетиниң тән җазасини тәкшүрүш әмәлдари манфрид новак, үрүмчини зиярәт қилғанда нурмуһәммәт ясинни йоқлиған вә тән җазасиға учраш әһвалини сүрүштүргән иди.

Хитай һөкүмити 2004 ‏- йили нурмуһәммәт ясин вә муһәррир күрәш һүсәйинләрни қолға елипла қалмай, йәнә нурмуһәммәтниң " ява кәптәр" елан қилинған қәшқәр әдәбиятиниң 4 - санини йиғивалған. Хитай даирилириниң бу һәрикити хәлқара җәмийәтниң тәнқидигә учриған, һәтта бу вәқә америка ташқи ишлар министирлиқиниң кишилик һоқуқ доклатида тилға елинған иди. (Әркин)