Xitay hökümiti Uyghur élide " léyfingdin öginish pa'aliyiti" ni élip bardi

"Shinjang géziti" ning xewiridin ashkarilinishiche, Uyghur aptonum rayonluq ittipaq komitétining orunlashturushi boyiche, shinjang uniwérsitéti qatarliq aliy mekteplerning oqughuchiliri, idare organlarning ishchi- xizmetchiliridin bolup, 12 mingdin artuq kishi ürümchidiki kochilarda qar we exletlerni tazilighan. Aptonum rayonluq hökümetke biwaste qarashliq organlarning xizmetchiliri, her qaysi soda saraylirida siyasiy, sehiye, qanun qatarliq témilarda teshwiqat élip barghan.

Xitay da'iriliri yene " léyfing" , " léyfingdin ayrilghan künler" qatarliq kinolarni ürümchidiki her qaysi soda sarayliri we kochilardiki chong ikranlarda qoyup, kishilerge " léyfingdin öginish" terbiyisini élip barghan. Xewerdin melum bolushiche, bu pa'aliyet shenbe küni Uyghur élining her qaysi jaylirida oxshash bolmighan shekillerde élip bérilghan. Jem'iy bir milyondin artuq adem seperwer qilin'ghan.

Xitay hökümiti "léyfingdin öginish" ning ilgharliqni saqlash we inaq jem'iyet qurushta muhim rol oynaydighanliqini bildürmekte. Biraq bir qisim pa'aliyetchiler bu heriketni xitay kompartiyisining idé'ologiye teshwiqatini kücheytip, öz hakimiyitini mustehkemleshtiki urunushlirining biri ikenlikini otturigha qoymaqta.

Dunya Uyghur qurultiyining bayanatchisi dilshat rishit ependi, xitay hökümitining léyfing obrazini özi oydurup chiqqanliqini bildürüp, uning hazirqi jem'iyetke mas kelmeydighan bu obrazni teshwiqat qilish arqiliq, puqralarni xitay kompartiyisige sadiq qilip terbiyileshke uruniwatqanliqini körsetti.(Arzu)