ئۈرۈمچىدە مالايسىيە - خىتاي مۇسۇلمانچە مەھسۇلاتلار مۇھاكىمە يىغىنى ئېچىلدى

26 ‏- نويابىر ئۈرۈمچىدە مالايسىيە -خىتاي مۇسۇلمانچە مەھسۇلاتلار مۇھاكىمە يىغىن ئېچىلغان بولۇپ، مەزكۇر يىغىندا، ئۇيغۇر ئىلى مۇسۇلمانچە مەھسۇلات كەسپى ۋە سودا ساھەسىدىكى ۋەكىللەر ئۇيغۇر ئىلى مۇسۇلمانچە مەھسۇلاتلارنىڭ مالايسىيادا ئېتىراپ قىلىنىش ۋە سېتىلىش ئىمكانىيەتلىرىگە ئائىت ئۇچۇرلارنى ئىگىلىگەن.

شىنخۇا ئاخبارات تورىدا بېرىلگەن خەۋەردە كۆرسىتىلىشىچە، مەزكۇر مۇھاكىمە يىغىنى مالايسىيانىڭ خىتايدا تۇرۇشلۇق ئەلچىخانىسى ۋە مۇسۇلمانچە مەھسۇلاتلار يەرمەنكىسى تەشكىللەش كومىتېتىنىڭ تەشكىللىشى ۋە ئۇيغۇر ئاپتونوم رايونلۇق سودا نازارىتىنىڭ ھەمكارلىقى ئاساسىدا ئۈرۈمچىدە ئېچىلغان.

مەلۇم بولۇشىچە، مالايسىيە باشقا ئىسلام دۆلەتلىرى بىلەن ئالاقە قىلىشتا كۆپ تەجرىبىگە ئىگە دۆلەت بولۇپ، بۇ مۇھاكىمە يىغىنى ئۇيغۇر ئېلىنىڭ مالايسىيانىڭ ئىقتىسادى ۋە مۇسۇلمانچە مەھسۇلاتلارنىڭ تەرەققىيات ئەھۋالىنى چۈشىنىش ۋە شۇنىڭغا ماس ھالدا ئۇيغۇر ئىلى مۇسۇلمانچە مەھسۇلاتلارنى كەڭ تەرەققىي قىلدۇرۇش ئىمكانىيىتىگە ئىگە قىلىدىكەن. (جۈمە)