Amérika Uyghur jem'iyiti shangxey guruhining herbiy manéwirini eyiblidi

Amérika Uyghur jem'iyiti we Uyghur kishilik hoquqi qurulushi peyshenbe küni bayanat élan qilip, rusiye bilen xitay bashchiliqidiki shangxey guruhining 9 ‏- awghusttin17 - awghustqiche ürümchi we rusiyining chilyabinskiy rayonlirida élip barmaqchi bolghan herbiy manéwiri, "térrorchiliq" qa qarshi turushla emes, belki yerlik xelqni tizginleshke qaritilghanliqini bildürdi.

Bayanatta, herbiy manéwir xitay hökümiti memliket ichi we sirtida Uyghurlarni qorqutush herikiti élip bériwatqanliqining shundaqla sherqiy türkistanda kishilik hoquq weziyitining téximu nacharlashqanliqining roshen ipadisi, dep körsetti. Bayanatta yene mundaq deydu, " shangxey guruhi xitay xelq jumhuriyitining asasiy kishilik hoquqni we Uyghur xelqning démokratik teleplirini basturushtiki yene bir qorali bolup qaldi".

Uyghur teshkilati bayanatida yene, shangxey guruhidiki döletler rehberlirining ürümchide manéwirni közdin kechüridighanliqini eyiblep, "shangxey guruhidiki rehberlerning ürümchige kélishi rusiye, qazaqistan, özbékistan, tajikistan we qirghizistanlar xitay xelq jumhuriyitining sherqiy türkistandiki Uyghurlargha qaratqan siyasitini qollaydighanliqini namayen qilishtur " dep körsetti.

Shangxey guruhidiki döletlerning bash shtab rehberliri peyshenbe küni ürümchige yighilip, manéwirning resmiy bashlan'ghanliqini jakarlighan. Manéwirning emeliy herbiy meshghulati shenbe küni rusiyining chilyabinskiy rayonida bashlinidu. (Erkin)