Xitay armiyisi Uyghur élide herbiy manéwir ötküzdi

Xitay hökümiti Uyghur élidiki musteqilchi küchlerge zerbe bérish üchün, yéqinda tengritagh boylirida herbiy manéwir ötküzdi.

Xitay azatliq armiye kündilik gézitining peyshenbe küni xewer qilishiche, bu qétimqi herbiy manéwir 8 - ayning otturiliri élip bérilghan. Xitay da'iriliri xewerde "sherqiy türkistanni kontrol qilish" ning herbiy manéwir ötküzüshtiki asasliq meqsidi ikenlikini alahide tekitligen.

Xewerge qarighanda, xitay armiye da'iriliri manéwir jeryanida atalmish düshmen küchlerni qurshawgha élip yoqitish we jeng meydanidiki zerbe bérish sitratigiyilirini meshiq qilghan. Emma xitay da'iriliri xewiride herbiy manéwirning konkrét qaysi jayda, qaysi waqitta élip bérilghanliqi we qanchilik waqit dawam etkenlikini izahlimighan. Shuning bilen bille, nime sewebtin mezkür xewerni waqtida élan qilmighanliqinimu ashkarilimighan.

Xitay hökümiti bu ayning bashlirida tashqurghanda, paksitan bilen birlikte térrorluqqa qarshi birleshme herbi manéwir élip barghan idi. Biraq kishilik hoqoq teshkilatliridin bolghan "xelq'ara kechürüm teshkilati" xitay hökümitining "xelq'ara térrorizimgha qarshi köresh" ni bahane qilip, hökümetning diniy, siyasiy we bashqa siyasetlirige naraziliq bildürgen Uyghurlarni basturiwatqanliqini izchil türde eyiplimekte. (Arzu)