Uyghur élide térrorchiliqqa qarshi herbiy manéwir élip bérildi

Xitayning Uyghur élidiki qoralliq saqchi qisim bash etritining alahide heriket qismi seyshenbe küni térrorchiliqqa qarshi herbiy meshq ötküzgen. "Shinjang géziti" ning xewiride körsitilishiche, saqchilar bu qétimliq herbiy meshiqning, dölet ichi we sirtidiki térrorchilarni perezdiki düshmen qilip, ularning melum bir türmige qoralliq hujum qilishi we bir binadiki xizmetchilerni görüge élishqa urunush ehwallirini tarmar qilish meshiqlirini élip barghan.

Qoralliq qisim bash etritining bashliqi fen changjyé, ularning bu herbiy meshiqni, Uyghur aptonom rayoni qurulghanliqining 50 yilliqini tebriklesh munasiwiti élip barghanliqini bildürdi. U yene, "eger biz térrorchiliqqa qarshi urushta ghelibe qilishni oylaydikenmiz, u chaghda biz choqum adettimu japaliq chéniqip, mushundaq keng kölemdiki herbiy meshiqlerni pat-pat élip bérishimiz kérek" dédi.

Gérmaniyidiki dunya Uyghur qurultiyining bayanatchisi dilshat rishit bu heqte inkas qayturup, xitay da'irilirining Uyghur aptonom rayoni qurulghanliqining 50 yilliqi harpisida, Uyghurlarning naraziliq pa'aliyetlirining yüz bérishidin endishe qilip, pütün Uyghur éli boyiche qattiq basturush herikitini élip bériwatqanliqini hemde bu mezgildin paydilinip, özini xelq'ara térrorchiliq qurbani dep körsitishke tirishiwatqanliqini bildürdi

U yene radi'omizgha, 28 - awghust küni kechte xitay saqchilirining ürümchidiki at beygisi meydanida 20 neper Uyghur yashni tutup ketkenlikini xewer qildi. Lékin ularning néme sewebtin tutqun qilin'ghanliqi we hazir nediliki téxi éniq emes. (Peride)