Qazaqistan - junggo térrorizmgha qarshi turush birleshme manéwiri bashlandi


2006.08.24

Qazaqistan bilen xitay qazaqistanning alma-ata rayoni we Uyghur aptonom rayonining ghulja shehiride élip baridighan we 26 - awghustqiche dawamlishidighan térrorizmgha qarshi birleshme manéwirini peyshenbe küni bashlidi.

Tengritagh 1-, dep nam bérilghan we alma-ata rayonida bashlan'ghan manéwir ghulja shehirigiche dawam qilidu. Her ikkila terep manéwirning tepsili détallirini we manéwirgha qatnishidighan qisimlar toghrisida melumat bérishni ret qilmaqta.

Qazaqistan ichki ishlar ministirliki manéwirgha qazaqistan chégra qoghdash qisimlirining qatnishidighanliqini bildürgen. Shinxu'a axbarat agéntliqi bolsa " éniq bolmighan sanda" junggo edliye we bixeterlik küchlirining qatnishidighanliqini xewer qildi.

Xitay metbu'atliri manéwirning tüp nishani térrorchi, bölgünchi we diniy esebiylerge qarshi turush, dep eskertmekte. Erkin yawropa radi'osi bolsa manéwirning 1997 -yili xitaylar bilen Uyghurlar arisida toqunush yüz bergen ghulja rayonida élip bériliwatqanliqini tilgha aldi.

Xelq'ara kechürüm teshkilatining ottura asiya tetqiqatchisi meysi wéchirdén," gerche junggo hökümiti shinjangdin qachqan we ottura asiyadiki nurghun Uyghur musapirlarni térrorchi, esebiy we bölgünchi, dep eyiblisimu, lékin biz buni ispatlaydighan pakitni körüp baqmiduq," deydu. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.