Хитай- қазақистан бирләшмә һәрбий маневири ахирлашти

Қазақистан- хитай бирләшмә маневириниң уйғур елиниң ғулҗа районида елип берилған иккинчи басқучи йәкшәнбә күни ахирлашти. Хитай мәтбуатиниң хәвәр қилишичә, маневирниң бу қисмиға йүзлигән сақчи қисимлири, алаһидә һәрбий қисимлири вә һәрбий тик учарлар қатнашқан.

Хитай вә қазақ һөкүмәт даирлириниң билдүрүшичә, биринчи басқучи қазақистанниң алма-ата районида өткүзүлгән маневирниң асаслиқ мәқсити аталмиш үч хил күчләргә йәни террорчилиқ, бөлгүнчилик вә диний әсәбиликкә қарши туруштин ибарәт икән. Шундақла бәзи мутәхәссисләрниң ейтишичә, хитай һөкүмити уйғур мустәқилчилириниң паалийәтлиридин әндишә қилмақта. Болупму бу йил май ейида хитай билән қазақистан оттурисидики нефит турба йоли ишқа башлиғандин кейин хитай һөкүмитиниң әндишиси техиму көпәйгән.

Лекин бәзи сиясий вә һәрбий мулаһизичиләр, хитай - қазақистан чегра районида икки дөләтниң бихәтәрликини тәһдит қилидиған җиддий бир паалийәт мәвҗут әмәс. Шуңа, хитай -қазақистан бирләшмә маневириниң асаслиқ нишани хитай билән қазақистанниң бир-биригә ишинидиғанлиқи вә террорлуқ паалийәтлиригә тақабил туруш күч вә иқтидариға игә икәнлики тоғрисида, америкиға бир сигнал әвәтиш болуши мумкин, дейишмәктә.

Хәвәрләргә қариғанда, шаңхәй һәмкарлиқ тәшкилати рамкиси ичидә елип берилған вә үч күн давамлашқан маневирға мәзкур тәшкилатқа әза русийә, қирғизистан, таҗикистан вә өзбекистан қатарлиқ дөләтләрдин йүзлигән көзәткүчи қатнашқан. (Қанат)