Xitay- qazaqistan birleshme herbiy manéwiri axirlashti

Qazaqistan- xitay birleshme manéwirining Uyghur élining ghulja rayonida élip bérilghan ikkinchi basquchi yekshenbe küni axirlashti. Xitay metbu'atining xewer qilishiche, manéwirning bu qismigha yüzligen saqchi qisimliri, alahide herbiy qisimliri we herbiy tik ucharlar qatnashqan.

Xitay we qazaq hökümet da'irlirining bildürüshiche, birinchi basquchi qazaqistanning alma-ata rayonida ötküzülgen manéwirning asasliq meqsiti atalmish üch xil küchlerge yeni térrorchiliq, bölgünchilik we diniy esebilikke qarshi turushtin ibaret iken. Shundaqla bezi mutexessislerning éytishiche, xitay hökümiti Uyghur musteqilchilirining pa'aliyetliridin endishe qilmaqta. Bolupmu bu yil may éyida xitay bilen qazaqistan otturisidiki néfit turba yoli ishqa bashlighandin kéyin xitay hökümitining endishisi téximu köpeygen.

Lékin bezi siyasiy we herbiy mulahizichiler, xitay - qazaqistan chégra rayonida ikki döletning bixeterlikini tehdit qilidighan jiddiy bir pa'aliyet mewjut emes. Shunga, xitay -qazaqistan birleshme manéwirining asasliq nishani xitay bilen qazaqistanning bir-birige ishinidighanliqi we térrorluq pa'aliyetlirige taqabil turush küch we iqtidarigha ige ikenliki toghrisida, amérikigha bir signal ewetish bolushi mumkin, déyishmekte.

Xewerlerge qarighanda, shangxey hemkarliq teshkilati ramkisi ichide élip bérilghan we üch kün dawamlashqan manéwirgha mezkur teshkilatqa eza rusiye, qirghizistan, tajikistan we özbékistan qatarliq döletlerdin yüzligen közetküchi qatnashqan. (Qanat)