Зиминис ширкити уйғур аптоном райони билән мәбләғ селиш келишими имзалиди

Германийиниң зиминис(Siemens) ширкити йеқинда уйғур аптоном райони һөкүмити билән мәбләғ селиш вә иқтисади һәмкарлиқни кеңәйтиш түрлири бойичә келишим имзалиди. Уйғур аптоном районлуқ тәрәққият вә ислаһат комитети билән зиминис ширкити оттурисидики келишим, нефит - химийә санаити, шәһәр асаси әслиһәләр қурулуши, електир истансиси, транспорт системиси, телефон алақилишиш техникиси, транспорматор, тибабәтчилик, йорутуш системиси, юқири бесимлиқ мәһсулатлар, аптоматик контрол системиси вә бинакарлиқ техникиси қатарлиқ саһәләрдики һәмкарлиқни кеңәйтиш вә мәбләғ селиш түрлирини өз ичигә алиду.

Бейҗиң һөкүмити хитай санаитиниң уйғур аптоном районидики нефит- тәбиий газ енергийә мәнбәәлиригә тайиниш қәдимини тезлитип, хәлқара ширкәтләрни районға җәлп қилиш үчүн тиришмақта.

Зиминис ширкити хитай шөбисиниң мудири хав руйчиң, зиминисниң кишилик һоқуқ, әмгәк һоқуқи, муһит қоғдаш вә уйғур тәшкилатлириниң тәнқидигә учраватқан ғәрбни ечиш истратегийисигә актип қатнишиватқанлиқини билдүргән. Зиминис ширкитиниң үрүмчидики ишханиси 2001 - йили ечилди. Мәзкур ширкәт 2005 - йили багаң 1 - авғуст полат - төмүр ширкити вә җоңго нефит туруба қурулуш ширкити билән, мәзкур ширкәтләрни техника вә әслиһәләр билән тәминләш келишими имзалиған. (Әркин)