Uyghurlar amérika dölet mejliside "Uyghur medeniyet küni" pa'aliyiti ötküzidu

Merkizi washin'gtondiki xelq'ara Uyghur kishilik hoquqi we démokratiye fondi jem'iyitining teshkillishi, amérika dölet mejlisi awam palatasining ezaliri tam lantos, frank wolf qatarliq zatlarning kapaliti bilen, amérika dölet mejlis binasida seyshenbe küni "Uyghur medeniyet künliki" ötküzilidu.

"Uyghur medeniyet küni" Uyghurlarning kiyim - kéchek, yimek - ichmek, örp - adet, chalghu eswabliri, usul, muzika we tarixiy miraslirini körsitishni asas qilghan.

"Uyghur medeniyet küni" seyshenbe küni kech sa'et 5:00 din 9:00 larghiche dawam qilishi mümkin. Xelq'ara Uyghur kishilik hoquqi we démokratiye fondi jem'iyiti bu heqtiki teklipnamisida" bu pa'aliyet Uyghur jama'itining özgiche Uyghur medeniyiti we en'enisini dölet mejlis ezaliri we dölet mejlisi xadimlirigha tonushturush jehette muhim purset bilen teminlimekte" dep yazghan.

Bu pa'aliyetke amérika dölet mejlisi ezasi tam lantos, frank wolf we kéngesh palata ezasi tam xarkinlar kapaletlik qilmaqta. Ular mejlis ezalirigha yazghan birleshme murajetnamisida, " xitayning Uyghur aptonom rayonidiki türkiy xelqler bolghan Uyghurlar tibetlerge oxshashla , uzundin béri hökümetning qollishi astidiki xitay köchmenlirige duch kelgen medeniyitini saqlap qélish kürishi élip barmaqta " deydu.

Awam palata ezasi tam lantos, frank wolf we kéngesh palata ezasi tam xarkinlarning murajetnamisida "xitay hökümiti Uyghurlarning iqtisadi we ma'arip erkinlikini boghmaqta. Kitab we ibadet yerlirini weyrane qilip, Uyghur tili ma'arip séstimisining ornigha xitay tili séstimisini dessetmekte " dep körsetti. Ular murajetnamisida amérika awam we kéngesh palata ezalirini Uyghur kishilik hoquqi we démokratiye herikitining rehbiri rabiye qadir yitekchilik qilghan " Uyghur medeniyet kéchiliki" ge teklip qilghan. (Erkin)