Германийидә уйғур ели мәдәнийәт һәптилики өткүзүлмәктә


2007.09.25

"Җуңгу шинҗаң мәдәнийәт һәптилики" ниң ечилиш мурасими, 24 ‏- сентәбир күни кәчтә германийиниң берлин шәһиридики җуңгу мәдәнийәт мәркизидә өткүзүлди.

Шинхуа агентлиқиниң берлиндин бәргән хәвиригә қариғанда, уйғур аптоном районниң муавин рәиси нур бәкри, хитайниң германийидә турушлуқ баш әлчиси ма шәнруң вә берлин ички ишлар идарисиниң мәсул хадими фурәйби мәдәнийәт һәптилики мурасиминиң ечилиш линтисини кәскән.

Нур бәкри мурасимда сөз қилип, " йеқинқи йиллардин буян шинҗаңниң иқтисадий вә мәдәнийитиниң наһайити тез тәрәққи қилип , мәдәнийәт турмушиниң бейиғанлиқини, шуңа герман хәлқиниң шинҗаңдики тәрәққиятларни келип өз көзи билән көрүп кетишини үмид қилидиғанлиқи " қатарлиқ сиясий тәшвиқатини елип барған.

Вәкилләр өмики мәдәнийәт һәптилики өткүзүш давамида уйғурларниң нахша ‏- усули, миллй кийим - кечики, рәсим, хәттатлиқ шуниңдәк филим әсәрлирини тонуштуридикән. 28 ‏- Вә 29 ‏- сентәбир күнлири вәкилләр өмики франкфорт билән дусәдоф шәһәрлиридә оюн көрситидикән.

Хитай даирилири, уйғурларниң иқтисади вә мәдәнийитиниң тәрәққи қилғанлиқини намайән қилиш үчүн, яврупадики бир қанчә дөләтләрдә "җуңгу шинҗаң мәдәнийәт һәптилики"паалийити елип барди. Шиветсийидә өткүзүлгән мәдәнийәт кечиликидә, шиветсийидә яшаватқан уйғурлар " уйғурларға әркинлик " " уйғурларға мүстәқиллиқ" дәп шуарлар товлиди. Норвигийидә өткүзүлгән мәдәнийәт һәптиликидә уйғурлар , сәһнидә номур көрсәткән уйғур артистлири билән бирликтә қисқиғина мәшрәп ойнап, вәтинигә болған сеғинишини көз йеши билән ипадилиди. Норвегийә мәтбуатлирида " бу мәдәнийәт хитайға тәвә әмәс" дегән темиларда уйғурларға аит обзор вә мақалилар елан қилинип, уйғурларниң хитай һөкүмитиниң түрлүк сиясий бесими астида яшаватқанлиқи баян қилинди.

Мәркизи германийидики дуня уйғур қурултийи германийидиму хитай һөкүмитиниң тәшвиқатиға қарши наразилиқ һәрикәтлири елип баридиғанлиқини билдүрмәктә. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.