Gérmaniyide Uyghur éli medeniyet heptiliki ötküzülmekte

"Junggu shinjang medeniyet heptiliki" ning échilish murasimi, 24 ‏- séntebir küni kechte gérmaniyining bérlin shehiridiki junggu medeniyet merkizide ötküzüldi.

Shinxu'a agéntliqining bérlindin bergen xewirige qarighanda, Uyghur aptonom rayonning mu'awin re'isi nur bekri, xitayning gérmaniyide turushluq bash elchisi ma shenrung we bérlin ichki ishlar idarisining mes'ul xadimi fureybi medeniyet heptiliki murasimining échilish lintisini kesken.

Nur bekri murasimda söz qilip, " yéqinqi yillardin buyan shinjangning iqtisadiy we medeniyitining nahayiti téz tereqqi qilip , medeniyet turmushining béyighanliqini, shunga gérman xelqining shinjangdiki tereqqiyatlarni kélip öz közi bilen körüp kétishini ümid qilidighanliqi " qatarliq siyasiy teshwiqatini élip barghan.

Wekiller ömiki medeniyet heptiliki ötküzüsh dawamida Uyghurlarning naxsha ‏- usuli, milly kiyim - kéchiki, resim, xettatliq shuningdek filim eserlirini tonushturidiken. 28 ‏- We 29 ‏- séntebir künliri wekiller ömiki frankfort bilen dusedof sheherliride oyun körsitidiken.

Xitay da'iriliri, Uyghurlarning iqtisadi we medeniyitining tereqqi qilghanliqini namayen qilish üchün, yawrupadiki bir qanche döletlerde "junggu shinjang medeniyet heptiliki"pa'aliyiti élip bardi. Shiwétsiyide ötküzülgen medeniyet kéchilikide, shiwétsiyide yashawatqan Uyghurlar " Uyghurlargha erkinlik " " Uyghurlargha müsteqilliq" dep shu'arlar towlidi. Norwigiyide ötküzülgen medeniyet heptilikide Uyghurlar , sehnide nomur körsetken Uyghur artistliri bilen birlikte qisqighina meshrep oynap, wetinige bolghan séghinishini köz yéshi bilen ipadilidi. Norwégiye metbu'atlirida " bu medeniyet xitaygha tewe emes" dégen témilarda Uyghurlargha a'it obzor we maqalilar élan qilinip, Uyghurlarning xitay hökümitining türlük siyasiy bésimi astida yashawatqanliqi bayan qilindi.

Merkizi gérmaniyidiki dunya Uyghur qurultiyi gérmaniyidimu xitay hökümitining teshwiqatigha qarshi naraziliq heriketliri élip baridighanliqini bildürmekte. (Eqide)