Мәһмуд қәшқәри һәққидики илмий муһакимә йиғини ечилди


2006.12.17

Истамбулдин игилишимизчә, 16-17-декабир күнлири түркийиниң истанбул шәһиридики шәрқий түркистан вәхпиниң тәшкиллиши билән истанбулдики "вефа толуқ оттура мәктипи" ниң йиғин залида 11-әсирдә өткән бүйүк уйғур алими мәхмут қәшқәри һәққидә бир илмий муһакимә йиғини ечилған.

Тәклимакан уйғур нәшриятиниң мәсули абдуҗелил туран әпәнди бу һәқтә бизгә мәлумат берип, йиғин ечилишиниң мәқситиниң мәһмуд қәшқириниң дуняға кәлгәнликиниң миң йиллиқини хатириләш икәнликини тәкитлиди.

Мәзкур илмий муһакимә йиғинида дуня уйғур қурултийиниң пәхрий рәиси генерал риза бекин ечилиш нутқи сөзлигән. Шуниңдәк йәнә мәһмуд қәшқәри вә барлиқ шәрқий түркистанниң һөрлүки, мәдәнийитини қоғдаш вә тәрәққи қилдуруш йолида вапат болған әзимәтләргә атап хәтмә қуран қилинған.

Мәзкур илмий муһакимә йиғинида шәрқий түркистан дәвасиниң мәрһум пешивалиридин, әйса йүсүп алиптекин, муһәммәд имин буғра қатарлиқларниң һаяти әслинип өтүлгән болуп, йиғинда түркийиниң атақлиқ тарихшунаслиридин профәссор гүлчин чандароғли ханим, профәссор зәкәраия китапчи шуниңдәк түркийидики уйғур алимлиридин доктор алимҗан инайәт, доктор султан мәһмуд қатарлиқларму қатнишип, илмий мақалилирини оқуп өткән.

Мәлумки, бу йил хитай һөкүмитиму қәшқәр шәһиридә мәһмуд қәшқәри туғулғанлиқиниң миң йиллиқини хатириләш йүзисидин чоң бир илмий муһакимә йиғини ачқан болуп, буниңда пешқәдәм уйғур алимлиридин имин турсун, уйғур сайрами қатарлиқлар мақалә оқуған, атақлиқ рәссам ғази әмәт мәхмуд қәшқәриниң тунҗи портерит рәсимини сизип чиққан иди. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.