Uyghur tijaretchi ablikim öz xirajiti bilen xotende mektep qurdi

Uyghur tijaretchi ablikim kamal öz yanchughidin 1 milyon 400 ming yu'en pul chiqirip, özi tughulup chong bolghan yurti xoten wilayiti qaraqash nahiyisining purchaqchi yézisigha bir mektep sélip berdi.

Tengritagh xewer torining melumatigha qarighanda, "igilik tiklesh ümid bashlan'ghuch mektipi" dep nam bérilgen bu mektep, bu yil 5 - ayda resmiy qurulush bashlighan. Buningdin xushal bolghan déhqanlar ablikim kamalgha köp rehmet éytishqan hemde abdukérim isimlik bir déhqan 8 yashliq oghlining béshini silap turup, " balam, emdi mektepke bérish üchün künde 10 kilométir yol méngip yürmeydighan boldung" dégen.

50 Yashlardiki ablikim kamal 18 yéshida yurtidin ayrilip, ürümchige tirikchilik qilish üchün barghan. U, shundin buyan japaliq ishlesh arqiliq yoqtin bar bolup, axiri öz igiligini yaratqan. Hazir uning öz aldigha mal yötkesh shirkiti bolghan.

Mektep yüzini körüsh imkaniyitige érishelmigen ablikim kamal yurtidiki shara'itning nacharliqini untup qalmay, bu yerge bir mektep qurup bérish qararigha kelgen. Shundaqla mezkur mektep qurulushi 9 - ayda pütse, purchaqchi yézisidiki her qaysi kentlerdin bolup 1000 din oshuq bala bu mektepke kirip oquydiken. (Peride)