Rabiye qadir xanim amérikidiki ikki ali mektepte Uyghurlar heqqide doklat berdi

Uyghur milliy herikitining rehbiri rabiye qadir xanim, mushu ayning 15 ‏- we 16 ‏- künliri, amérikining boston shehiridiki eng dangliq ikki ali mektepte, Uyghurlar heqqide doklat berdi .

Uyghurlarning démokratiye we kishilik hoquqini qolgha keltürüsh üchün pa'aliyet élip bériwatqan rabiye qadir xanim, bostondiki massachuséts téxnologiye inistituti we xarward uniwérsititida Uyghurlarning nöwettiki weziyiti heqqide nutuq sözlep, mezkür ali mekteptiki proféssor, tetqiqatchi we oqughuchilarning Uyghurlargha bolghan hésdashliqini qozghidi.

Rabiye qadir xanim" xitay hökümitining Uyghurlarni basturushi we ziyankeshliki" dégen témidiki nutqida, xitay komunistik partiyisining Uyghurlargha qaratqan siyasi bésimi, bolupmu ma'arip, din we kishilik hoquq depsendichiliklirini otturigha qoyush bilen birge xitay hökümitining xelq'ara térrorchiliqqa zerbe bérish kürishidin paydilinip, ténch yosunda öz heq - hoquqlirini qolgha keltürüsh yolida pa'aliyet élip bériwatqan Uyghurlarni" térrorchi" dep eyiplishi , qolgha élishi, türmilerge tashlishi we hetta ölüm jazasi bilen qetle qilishi, eksiche bu döletning térrorluq siyasiti yürgüzüwatqanliqining ispati dep körsetti.

Rabiye qadir xanim, 2005 ‏- yili 17 ‏- mart küni xitay türmisidin qoyup bérilgen kündin buyan, amérika we yawrupa elliride Uyghur xelqining erkinliki üchün toxtimastin heriket élip bérip, Uyghurlarning siyasiy teqdiride chong özgürüshlerni meydan'gha keltürdi. Xitay da'iriliri rabiye xanimning chet'ellerde élip bériwatqan pa'aliyetlirini qattiq eyibleshtin sirt, uning ikki perzentni ayrim ‏- ayrim 9 yilliq we 7 yilliq qamaq jazasigha höküm qildi.

Chet'ellik we Uyghur siyasiy pa'aliyetchiler": xitay hökümitining , rabiye xanimning gunahsiz perzentlirini türmige tashlishi, uning xelq'arada élip bériwatqan pa'aliyetliridin ochuq ‏- ashkare öch élish hésablinidu" diyishmekte. (Eqide)