Jiger yallughigha giriptar bolghuchi dawager yash ösmürler hökümetning bésimida erzini qayturuwaldi

Uyghur aptonom rayonining merkizi ürümchidiki sheherlik 15 ‏- ottura mektepte bir qisim oqughuchilarning jiger yallughi sewebidin a'ilisige qayturulghanliqigha naraz bolup sot mehkimisige erz sun'ghan ata - anilar, hökümetning bésimi astida erznamisini qayturuwaldi.

Ürümchi tengritagh rayonluq sot mehkimisi dawagerlerning erzini qayturwalghanliqi sewebidin dawaning emeldin qalghanliqini jakarlighan. Tengritagh rayonluq sot mehkimisi peyshenbe küni jiger yallughigha giriptar bolghuchi yash ösmürlerning erzini körüp chiqip, ürümchi sheherlik ma'arip idarisi üstidin dawa achqan ata - anilarning erzini qayturwalghanliqini we buning bilen diloning küchtin qalghanliqini élan qildi.

Sheherlik ma'arip idarisi teripidin a'ilisige mejburiy qayturuwitilgen 19 neper oqughuchining köp qisimi qeshqer, turpan qatarliq jaylardin kelgen namrat Uyghur oqughuchilar idi. Weqedin kéyin 7 neper oqughuchining ata - anisi sheherlik ma'arip idarisi üstidin sot mehkimisige erz sunup, ma'arip da'irilirini perzentlirining ma'arip telim - terbiye élish hoquqigha dexli - terüz qilish bilen eyibligen.

Xewerlerge qarighanda ata - anilar sot mehkimisige erz sun'ghandin kéyin jama'et xewpsizlik da'iriliri bu mesilige ariliship, ata - anilargha erzinamini qayturuwélish heqqide bésim ishletken. Saqchilar bezi ata - anilarni jama'et xewpsizlik idarisigha élip bérip erzinamini qayturuwélish iltimasigha qol qoydurghan. Bezi metbu'atlar, Uyghur aptonom rayoni da'irilirini saqchilarning puqralar hoquqini ayagh - asti qilishtek bu xil herikiti üstidin tekshürüsh élip bérishqa chaqirdi.(Erkin)