Xelq'ara metbu'atining diqqiti Uyghurlarda

 Türkistan islam partiyisi namliq teshkilatning yéqinda intérnétte élan qilghan bayanati we xitay da'irilirining xitaydiki térror tehditi heqqidiki bir - birige zit bayanatliri, xelq'ara jama'etning diqqitining qaytidin Uyghurlar we sherqiy türkistan mesilisige burulushigha seweb boldi.

Her küni dégüdek xelq'ara metbu'atta, Uyghurlar, sherqiy türkistan we xitay hökümitining Uyghurlargha qaratqan siyasiti heqqide maqale we mulahiziler élan qilinmaqta shuningdek tetqiqat institutliri Uyghurlarning tarixi, bügünki ehwali we xitay hakimiyitige qarshi élip bériwatqan küreshlirining nishani heqqide mulahiziler élan qilmaqta.

7‏ - Ayning 31‏ - küni amérikidiki muhim we nopuzluq tetqiqat merkezlirining béri hésablan'ghan tashqi munasiwetler kéngishi teripidin arqa - arqidin élan qilin'ghan "Uyghurlar we shinjang rayoni" we " sherqiy türkistan islamiy herikiti" namliq ikki maqale bu ning yirik misalidur.

Birinchi maqalide, sherqiy türkistanning qisqiche tarixi, teb'iy bayliqliri, Uyghur élidiki xitay hakimiyiti, xitay hökümitining Uyghur élige qaratqan iqtisadiy we Uyghur élige xitay yötkesh siyasiti, Uyghurlar bilen xitaylar otturisidiki ixtilap we ziddiyetler, béyjing hökümitining xelq'ara térrorluqqa qarshi urushtin Uyghurlarni basturush üchün qandaq paydilan'ghanliqi, qatarliq mesililer heqqide melumat bérilgen.

Tashqi munasiwetler kéngishi teripidin élan qilin'ghan ikkinchi maqalide bolsa, Uyghurlar we Uyghurlarning xitay hakimiyitige qarshi élip biriwatqan qarshiliq heriketliri, sherqiy türkistan islamiy herikiti, sherqiy türkistan islamiy herikitining xitay hökümitige qarshi élip barghan hujumliri, bu teshkilatning xelq'ara térrorluq teshkilatliri bilen alaqisining bar yaki yoqliqi, xitay hökümitining bu heriketke qarshi alghan tedbirliri we sherqiy türkistan islamiy herikitining béyjing olimpik tenheriket yighini üchün tehdit bolup - bolmighanliqi qatarliq mesililer otturigha qoyulghan we bu heqte melumat bérilgen.