Уйғур илидә мийип балиларниң аз дегәндә 40 % и оқушсиз қеливатиду


2008.01.25

Уйғур илидә мийип балиларниң оқушсиз қелиш нисбити хитайдики һәр қайси өлкә - аптоном район вә алаһидә шәһәрләр ичидә әң юқири болуп,оқуш йешидики мийип балиларниң аз дегәндә 40 % и мәктәпкә баралмайдикән. Уйғур аптоном райони маарип назаритиниң партийә секритари җав деҗуңниң алдинқи күни ечилған аптоном район маарип хизмәт йиғинида әскәртишичә, нөвәттә уйғур илидә оқуш йешидики мийип өсмүрләрниң мәктәпкә кириш нисбити 59% болуп, аз дегәндә 40 % өсмүрниң оқушсиз қеливатқанлиқи мәлум болди.

Җав деҗуң йәнә , бу нисбәт хитайниң мәмликәтлик оттуричә сәвийисидин төвән туридиғанлиқини тәкитлигән. Хитайниң 2006 ‏- йилдики статистикисида шу йили уйғур илидики 15 яштин төвән мийип өсмүрләрниң санини 35 миң 818 дәп елан қилған. Хәвәрләргә қариғанда , нөвәттә уйғур илидики үрүмчи, қарамай, ғулҗа, шихәнзә, чөчәк, қәшқәр вә корлидин ибарәт 7 шәһәрдә мийиплар мәктипи болғандин сирт, қалған шәһәрләрдә мийиплар мәктипи йоқ икән. Шинхуа агентлиқиниң әскәртишичә, хитайниң 9 йиллиқ мәҗбурий маарип қануни йолға қоюлғанға хели йиллар болуп қалған болсиму, лекин уйғур аптоном райони даирилири мийип балиларға 9 йиллиқ мәҗбурий маарип түзүмини бу йилдин башлап йолға қоюшни қарар қилған.

Шинхуа агентлиқиниң бу һәқтики хәвиридә даириләрниң 2008 ‏- йилдин 2012 ‏- йилғичә уйғур илидики мийип өсмүрләргә қарита " алаһидә маарип тәрәққият пилани " һазирлап, нопуси 30 миңдин ашидиған һәр бир наһийә вә шәһәрдә бирдин мийиплар мәктипи қурушни қарар қилғанлиқини билдүрди. Көзәткүчиләрниң әскәртишичә, уйғурлардики мийиплар мәсилиси һазирға қәдәр җәмийәт тәрипидин көңүл бөлүшкә еришәлмәй кәлгән җиддий мәсилиләрниң биридур.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.