Génitikilik tekshürüsh Uyghur aptonom rayonidiki bir heqiqetni ispatlidi

Yaponiye zhornalistliri 15-april küni yaponiyining tokyo shehiride échilghan yipek yoli körgezmiside, 2002-yili krorandin tépilghan momayni ziyaret qilmaqta. AFP

Génitikilik tekshürüsh, tarim oymanliqidin tépilghan qedimqi jesetlerning irqiy tipi toghrisidiki siyasi talash - tartishlarni chetke qéqip, tarimdiki qedimqi jesetlerning kafkaz tipididiki xelqlerge tewelikini éniqlighan.

Qedimi jesetler tetqiqati bilen shughullinidighan amérikiliq mutexessis, "tarim oymanliqidiki momyalar" namliq eserning aptori proféssor wiktor meyir, "zamanimizdiki DNA ülgilirini qedimqi dewrdiki DNA ülgisi bilen sélishturghanda Uyghur, qazaq, qirghizlarni öz ichige alghan ottura asiyaliqlar kafkazlar we shimali asiyaliqlar bilen arilash tiptiki insanlar ikenliki körsetmekte ," dep tekitligen.

Fransiye axbarat agéntliqining xewer qilishiche, xitay hökümiti bu uchurni élan qilishni hazirgha qeder kéchiktürgen bolup, buning Uyghurlardiki bölünüsh tuyghusini téximu kücheytiwétishidin endishe qilidiken.

Xitay arxé'ologi wang xu'abing bilen tarixshunas ji xyenlinlar "shinjangdiki qedimiy jesetler" namliq kitabida, "Uyghur bölgünchiler" ning qedimiy jesetlerni "shinjang" jonggoning bir qisimi emes, dégen neziriyini ispatlash üchün destek qiliwalghanliqini ilgiri sürgen. Emma proféssor wiktor meyir, fransiye axbarat agéntliqigha "qedimqi jesetler mesilisini siyasilashturush shundaqla buningdin bir toqay ixtilaplarni yaritish kishini epsuslanduridighan bir ish," dep körsetken.

Yéqinda Uyghur aptonom rayoni partkomining sékritari wang léchüü'en, "shinjang tarixi zor siyasi mesile" dep tekitligen idi. (Erkin)