Xitay hökümiti muhajirlarning 2007 - yilliq shinjanggha i'ane qilish pa'aliyiti bashlidi


2007.03.18

Uyghur élining tor betliride élan qiliniwatqan xewerlerge qarighanda, ötken hepte béyjingda "dunya junggoluq hemde junggoluq muhajirlar teshkilatliri birleshmisi bilen Uyghur aptonum rayonluq hökümet birlikte i'ane qilish murasimi ötküzgen. Hemde buning bilen xitay sodigerliri hemde xitay muhajirlirining bu yilliq shinjanggha i'ane qilish pa'aliyiti bashlan'ghan. Yighinda Uyghur aptonum rayonining re'isi isma'il tiliwaldi, barliq junggoluq hemde junggoluq muhajhirlarni shinjanggha kélip meblegh sélishqa chaqirghan.

Xewerde körsitilishiche bu teshkilat hazirgha qeder Uyghur élidiki namrat rayonlar, hemde ümüd mekteplirige 20 milyon yü|en qimmitide pul we maddi boyumlarni i'ane qilghan.

Nöwette chet'eldiki bezi shirket hemde sodigerler Uyghur éligha her türde meblegh salghandin bashqa i'ane qilish pa'aliyitinimu élip barmaqta. Lékin xitay hökümiti bezi Uyghur xalis i'ane qilghuchi muhajir yaki sodigerlerning Uyghurlargha paydiliq ishlar üchün pul serp qilishigha yeni mektep qurush, meschit qurushqa oxshash xalis ishlirigha türlük cheklime qoyup tosqunluq qilip kéliwatqan bolghachqa bezi saxawetchiler Uyghur élidiki yardemge muhtajlargha yardem qilish niyitidin yénishqa mejbur bolghan.

Xelq'araliq bezi fondi jemiyetliri Uyghur élige mexsus türler boyiche turaqliq yardem sommisimu ajratqan. Emma bezi Uyghurlarning inkasigha qarighanda hökümet da'irliri Uyghur élige qilin'ghan omumiy yardem sommisi hemde uning teqsimlinishi heqqide uchuq hésap kitap qilmighan shundaqla heqiqiy yardemge muhtaj namrat hemde apetke uchrighan xelqning hökümet yaki xalis kishiler teripidin yardemge érishishi tes bolup kelmekte iken. 2004 - Yili qeshqer chongqurchaqta yüz bergen éghir yer tewresh apitige uchrighan Uyghur déhqanliri üch kün'giche qutquzush hemde yardemge érishelmigen idi. Hetta öysiz qalghan bezi déhqanlar qishning soghaq künliride bir qanche ayghiche kepilerde yashidi. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.