Uyghur aptonom rayonluq wekiller xelq qurultiyida muhit mesilisini otturigha qoyidu

Xitay xelq qurultiyining shenbe küni bashlinidighan memliketlik yighinigha qatnishidighan bezi wekiller, Uyghur aptonom rayonining muhit mesilisini, qurultayning muzakire küntertipige kirgüzüshni telep qilidiken.

Xitay metbu'atlirining xewer qilishiche, xitay xelq qurultiyining wekili, jughrapiyishunas li jijong, Uyghur aptonom rayonida tupraqning qumlishish mesilisi intayin éghirliqini eskertip, muhim qoghdashni kadirlarning xizmet töhpisini bahalaydighan ölchem qilishni telep qilghan. Li jijongning ashkarilishiche, jing nahiyiside poyiz istansisining yénidiki iskilatning témi 10 yil ichide qum astida qalghan shundaqla xoten deryasining wadisidiki iptida'iy toghraqliqning ٪80 késiwétilgen.

Nopusni kontrol qilmighanda ékélogiyilik muhitning éghir tesirge uchraydighanliqini agahlandurghan li jijong, "shinjangda yer - zimin keng adem azliqini tekitlep, yashashqa bolidighan jaylarning azliqini untup qalmasliq kérek," dep körsetken.

Shinxu'a axbarat agéntliqining xewer qilishiche, Uyghur aptonom rayoni nopusi yilda ٪ 17 etrapida köpeymektiken. Analizchilar, Uyghurlar nopusining yilliq teb'iy köpiyish nisbiti ٪ 3 ge yetmeydighanliqi'ini bildürmekte. Ularning körsitishiche, ٪ 17 köpiyish rayon'gha kélip olturaqlishiwatqan köchmenler nupusidiki artishni asas qilghan. Hökümet istatistikiliri boyiche, rayondiki xitay nopusining 1950 - yildiki sani omumi nopusning ٪ 6 ni igileytti. Hazir rayondiki xitay nopusi ٪ 47 ge chiqqan. (Erkin)