Gherbiy diyarning ékologiyilik muhiti iqtisadiy tereqqiyat éhtiyajini qanduralmaydu

Xitay da'irilirining yéqinda, gherbiy diyarning ékologiyilik muhitini omumyüzlük bahalap chiqarghan bir parche doklatida, xitayning gherbiy rayonliridiki ékologiyilik muhitida tüp yaxshilinish bolmighanliqi hemde nurghun ékologiye séstimilirida oxshimighan derijide keynige chékinish ehwalliri körülgenliki yézilghan. Shundaqla uningda yene, bu ehwalning kelgüside iqtisadiy tereqqiyatning éhtiyajini qanduralmaydighanliqi tekitlen'gen.

Mezkur doklat, xitay pen-téxnika tetqiqat jem'iyetliri birleshmisining 2005 - yilliq ilmiy muhakime yighinida otturigha qoyulghan bolup, xitay qurulush akadémiyisining akadémiki wang wénshing, gherbiy rayonlarda élip barghan omumyüzlük tekshürüshke asaslan'ghanda, bu rayonda yépincha ösümlükler yoqilishqa yüzlinish, yerlerni qum bésip kétish we suning bulghinish ehwallirining bir qeder éghir ikenlikini doklat qilghan.

Lékin bu yighinda, xitayning gherbni échish siyasitining bu rayonlarning ékologiyilik muhitigha tesir yetküzmeydighanliqi ilgiri sürülgen. Xelq'aradiki bir qisim muhit qoghdighuchi teshkilatlar hemde tibet we Uyghur dawasini qilidighan orunlar, xitayning gherbni échish siyasitining hergizmu yerlik xelqlerning turmushini yaxshilashni meqset qilmaydighanliqini, shundaqla xitayning bu jaylarda élip baridighan qurulushlirining mezkur rayonning ékologiyilik muhitigha éghir tesir körsitidighanliqini tekitlimekte. (Peride)