Tengritagh muz taghliridin insanlarning atmosférani bulghighanliq ispatliri tépildi

Mutexessisler tengritaghdiki muz tagh qatlimidin insanlarning atmosférani bulghighanliqigha a'it ispatlarni bayqidi. Bu netije, insanlar olturaqlashmighan yiraq jaylarningmu bulghunushqa uchrighanliqidin dérek béridu.

Xitay xewer agéntliqining melum qilishiche, mutexesisisler tengritaghdiki 1‏-nomurluq muz taghning 1955‏- yildin 1998‏- yilighiche shekillen'gen muz qatlimida tekshürüsh élip bérip, uningdin insanlar keltürüp chiqarghan bulghinishlarni bayqighan. Netijide tengritagh atmosférasiningmu alliqachan bulghinip bolghanliqi ispatlan'ghan.

Bu tekshürüshni élip barghan xitay penler akadimiyisining muhit gé'o-ximiyisi döletlik nuqtiliq tejribixanisining mutexessisi li shinching doklatida, tengritaghning 1‏-nomurluq muz téghida xatirilen'gen bulghan'ghan madda terkiwining asasliqi,ürümchi shehirining etrapigha jaylashqan sheher-kentlerdiki kishiler keltürüp chiqarghan atmosféra bulghinishidin kélip chiqqanliqini otturigha qoyghan. Muz taghlar atmosféradiki bulghinish terkiwini xatirilep qalidighan alahidilikke ige.

Mutexessis li shinching, tengritaghliridiki atmosféra qatlimining bulghinishining mutexessisler alahide köngül bölüshke tégishlik bir ehwal ikenlikini tekitlidi. (Peride)