Xitay ürümchi muhiti bulghan'ghan peytte bulturqidin üch hesse köp salyotni bazargha saldi

Aldinqi bir nechche künde ürümchining hawa bulghinishi alahide éghir bolghan bolup, xitaydiki ottura tiptiki sheherler ichide hawa bulghinishi eng éghir sheher bolghan. Bu xil ehwal dawamliq körülüp turmaqta.

Gerche mutexessisler ürümchi hawa muhitining bulghunishidiki asasliq sewebning sheherning nopus sighimchanliqning heddidin ziyade zichliqi hemde qish künide ürümchi ahalisining kömürni asasliq yéqilghu qilghanliqi we yene aptomobillarning köpiyishi qatarliq seweblerni körsitip kelgen bolsimu emma tengritagh torida ürümchi da'irliri ürümchining hawasini bulghawatqan asasliq amil kawapchilarning kawap pishurushqa kömürni yéqilghu qiliwatqanliqi dep körsetti.

Emma Uyghur kawapchi tijaretchilerdin igilishimizge qarighanda nöwette kawapchilar kawaplirining bazar tépishi hemde muhitni bulghimasliq üchün otunda kawap pishurup kéliwatqan bolup, Uyghurlar da'irilerning hawa bulghunishnimu cheklik sandiki kawap tijaretchilirige dönggigenlikining héchkimni qayil qilalmaydighan exmiqaniliq ikenlikini bildürmekte.

Xitay da'irliri ürümchi hawa muhitining éghir bulghan'ghanliqini tekitlesh bilen bir waqitta mentiqe jehettin ziddiyetlik halda, bu yil xitayning chaghan bayramgha ülgertip bulturqigha qarighanda töt yüz xildin artuq saliyotni köpeytip bazargha salghanliqini her qaysi xewer tor betliride xewer qildi. Shundaqla ürümchide bu yil bulturqigha qarighanda üch hesse köp salyot sétilidiken.

Emeliyette salyot étish hawani eng qattiq bulghughuchi boyum bolup, xitayning nurghun sheherliride bir qanche yil ilgirila salyot étishqa chek qoyghan hetta bezi sheherler pütünley chekligen. (Gülchéhre)