مۇقام ۋارىسلىرىنى تەربىيىلەش مەركەزلىرى ئېچىلماقچى


2005-03-29
Share

ئۇيغۇرلارنىڭ قەدىمى مەدەنىيەت ۋە سەنئەت مىراسى بولغان 12 مۇقامنى قوغداش ۋە ئۇنىڭ ۋارىسلىرىنى تەربىيىلەش ئۈچۈن، بۇ يىل قەشقەر، غۇلجا، ئاقسۇ ۋە خوتەن قاتارلىق جايلاردا مۇقام سەنئىتى ۋارىسلىرىنى تەربىيىلەش مەركىزى قۇرۇلماقچى.

خىتاينىڭ شىنخئۇا ئاگېنتلىقىنىڭ خەۋىرىدىن ئاشكارىلىنىشىچە، مۇقام سەنئىتىنى قوغداش ئىشلىرىدا نۆۋەتتە ۋارىسلارنىڭ ئاز بولىشى، تەربىيىلەش سورۇنلىرىنىڭ كەم بولىشى، شۇنداقلا ئومۇملىشىش دائىرىسىنىڭ تار بولىشى قاتارلىق مەسىلىلەر مەۋجۇت ئىكەن.

خەۋەردە ئېيتىلىشىچە، مۇقام سەنئىتى ۋارىسلىرىنى تەربىيىلەش مەركەزلىرىنىڭ ئاساسلىق ۋەزىپىسى يەرلىك ئورۇنلاردا يىتەرلىك مۇقامچىلارنى تەربىيىلەپ، بىر ۋە ياكى بىر قانچە مۇقامنى مۇكەممەل ئورۇنلىيالايدىغان سەۋىيىگە يەتكۈزۈشنى مەقسەت قىلىدىكەن. ھەر قايسى مەركەزلەردە پېشقەدەم مۇقام ئۇستازلىرى ئاغزاكى ۋە يازما تەلىم بېرىش ئۇسۇلىنى بىرلەشتۈرۈپ ياش مۇقامچىلارنى تەربىيىلەيدىكەن.

ناخشا- ئۇسۇل ۋە مۇزىكا زىچ بىرلەشتۈرۈلگەن 12 مۇقام سەنئىتى ئۇيغۇرلارنىڭ تۇرمۇشىنى ئەكس ئەتتۈرىدىغان ئېنىسكلوپېدىيە ۋە تىرىك مەدەنىي يادىكارلىق دەپ قارىلىپ كەلمەكتە.

12 مۇقام سەنئىتى ئۆتكەن يىلى بىرلەشكەن دۆلەتلەر تەشكىلاتى مائارىپ، ئىلىم- پەن ۋە مەدەنىيەت كومىتېتىنىڭ ئىنسانلار ئارىسىدا ئاغزاكى ساقىلىنىۋاتقان مەدەنىيەت بايلىقلىرى تىزىملىكىگە سۇنۇلغان ئىدى. ئەگەر ئۇ بۇ يىل 7 - ئايدا تەستىقلانسا، ب د ت ئۇنى قوغداش ۋە داۋاملىق ساقلاپ قېلىش ئۈچۈن مەخسۇس مەبلەغ ئاجرىتىدۇ. (ئارزۇ)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت