Muqam warislirini terbiyilesh merkezliri échilmaqchi

Uyghurlarning qedimi medeniyet we sen'et mirasi bolghan 12 muqamni qoghdash we uning warislirini terbiyilesh üchün, bu yil qeshqer, ghulja, aqsu we xoten qatarliq jaylarda muqam sen'iti warislirini terbiyilesh merkizi qurulmaqchi.

Xitayning shinx'u'a agéntliqining xewiridin ashkarilinishiche, muqam sen'itini qoghdash ishlirida nöwette warislarning az bolishi, terbiyilesh sorunlirining kem bolishi, shundaqla omumlishish da'irisining tar bolishi qatarliq mesililer mewjut iken.

Xewerde éytilishiche, muqam sen'iti warislirini terbiyilesh merkezlirining asasliq wezipisi yerlik orunlarda yiterlik muqamchilarni terbiyilep, bir we yaki bir qanche muqamni mukemmel orunliyalaydighan sewiyige yetküzüshni meqset qilidiken. Her qaysi merkezlerde péshqedem muqam ustazliri aghzaki we yazma telim bérish usulini birleshtürüp yash muqamchilarni terbiyileydiken.

Naxsha- usul we muzika zich birleshtürülgen 12 muqam sen'iti Uyghurlarning turmushini eks ettüridighan énisklopédiye we tirik medeniy yadikarliq dep qarilip kelmekte.

12 Muqam sen'iti ötken yili birleshken döletler teshkilati ma'arip, ilim- pen we medeniyet komitétining insanlar arisida aghzaki saqiliniwatqan medeniyet bayliqliri tizimlikige sunulghan idi. Eger u bu yil 7 - ayda testiqlansa, b d t uni qoghdash we dawamliq saqlap qélish üchün mexsus meblegh ajritidu. (Arzu)