Хитай һөкүмити қурбан һейтниң һарписида, хәлқ арисида җиддий кәйпият яратмақта


2005-01-06
Share

Қурбан һейтниң йеқинлишиши билән хитай һөкүмити, уйғур елиниң бир қисим җайлирида "үч хил күч" кә зәрбә бериш һәрикити елип берип, хәлқ арисида җиддий кәйпият яратмақта.

Шәрқий түркистан учур мәркизиниң хәвәр қилишичә, ақсуниң бай наһийиси йеқинда һәр 10 аилиликни бир гуруппа қилип тәшкилләп, өз- ара назарәт қилиш түзүмини орнатқан һәмдә улар арисида, "үч хил күч" ниң алдини елиш вә уларға зәрбә бериш һәрикити елип барған.

Қәшқәрниң йеңишәһәр наһийисидиму, һөкүмәт даирилири хитай компартийисиниң әзалири, һәрбийликтин чикингәнләр вә бир қисим актип деһқанлардин 1200 гә йеқин хизмәт гуруппилирини тәшкилләп, үч хил күчниң алдини елиш вә зәрбә бериш һәрикитини елип барған. Һәмдә гуруппиларниң мунасивәтлик әһвалларни юқири дәриҗилик органларға доклат қилишни тәләп қилған. Йеңишәһәр наһийисиниң мәлум бир йезисидин зияритимизни қубул қилған бир уйғур, йезидики вәзийәтниң һәқиқәтән җиддиләшкәнликини билдүрди.

Буниңдин сирт, ғулҗа шәһириниң җамаәт хәвпсизлик хадимлири билән қораллиқ сақчилар бирлишип, чарлаш әтрити тәшкиллигән вә пәвқуладдә бир вәқә йүз беришиниң алдини елиш үчүн, йеңи йилдин буян 24 саәт чарлаш елип беришни башлиған.

Хитайниң уйғур елигә тәйинлигән партком баш секритари ваң лечүән буниң алдида һәр қайси органларға "үч хил күч" гә қарши юқири бесимлиқ бастуруш сияситини давамлаштуруш һәққидә буйруқ бәргән иди. Хитай һөкүмити "үч хил күч" гә ениқ ениқлима бәрмәстин, диний вә сиясий көз қарашлирини оттуриға қойған уйғурларни буниңдин пайдилинип бастуруп кәлмәктә.

Дуня уйғур қурултийиниң баянатчиси дилшат ришит, хитай һөкүмитиниң қурбан һейтниң һарписида хәлқ арисида җиддий кәйпият пәйда қилип, хәлқниң хатирҗәм һейт өткүзишигә дәхли - тәруз йәткүзиватқанлиқини әйиплиди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт