Xitay hökümiti qurban héytning harpisida, xelq arisida jiddiy keypiyat yaratmaqta


2005-01-06
Share

Qurban héytning yéqinlishishi bilen xitay hökümiti, Uyghur élining bir qisim jaylirida "üch xil küch" ke zerbe bérish herikiti élip bérip, xelq arisida jiddiy keypiyat yaratmaqta.

Sherqiy türkistan uchur merkizining xewer qilishiche, aqsuning bay nahiyisi yéqinda her 10 a'ililikni bir guruppa qilip teshkillep, öz- ara nazaret qilish tüzümini ornatqan hemde ular arisida, "üch xil küch" ning aldini élish we ulargha zerbe bérish herikiti élip barghan.

Qeshqerning yéngisheher nahiyisidimu, hökümet da'iriliri xitay kompartiyisining ezaliri, herbiyliktin chikin'genler we bir qisim aktip déhqanlardin 1200 ge yéqin xizmet guruppilirini teshkillep, üch xil küchning aldini élish we zerbe bérish herikitini élip barghan. Hemde guruppilarning munasiwetlik ehwallarni yuqiri derijilik organlargha doklat qilishni telep qilghan. Yéngisheher nahiyisining melum bir yézisidin ziyaritimizni qubul qilghan bir Uyghur, yézidiki weziyetning heqiqeten jiddileshkenlikini bildürdi.

Buningdin sirt, ghulja shehirining jama'et xewpsizlik xadimliri bilen qoralliq saqchilar birliship, charlash etriti teshkilligen we pewquladde bir weqe yüz bérishining aldini élish üchün, yéngi yildin buyan 24 sa'et charlash élip bérishni bashlighan.

Xitayning Uyghur élige teyinligen partkom bash sékritari wang léchü'en buning aldida her qaysi organlargha "üch xil küch" ge qarshi yuqiri bésimliq basturush siyasitini dawamlashturush heqqide buyruq bergen idi. Xitay hökümiti "üch xil küch" ge éniq éniqlima bermestin, diniy we siyasiy köz qarashlirini otturigha qoyghan Uyghurlarni buningdin paydilinip basturup kelmekte.

Dunya Uyghur qurultiyining bayanatchisi dilshat rishit, xitay hökümitining qurban héytning harpisida xelq arisida jiddiy keypiyat peyda qilip, xelqning xatirjem héyt ötküzishige dexli - teruz yetküziwatqanliqini eyiplidi. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet