جۇ يۈنكاڭ ئۇيغۇر ئېلى زىيارىتىدە مۇقىملىقنىڭ مۇھىملىقىنى تەكىتلىدى


2008.01.28

ھازىر ئۇيغۇر ئېلىدە زىيارەتتە بولۇۋاتقان خىتاي مەركىزى كومىتېتى سىياسىي بيۇروسىنىڭ ئەزاسى جۇ يۈنكاڭ، ئۇيغۇر ئېلىدە تۇرۇشلۇق خىتاي ھۆكۈمىتى خادىملىرىغا، بۆلگۈنچىلىك، سىڭىپ كىرىش ۋە ئاغدۇرمىچىلىق ھەرىكەتلىرىگە نىسبەتەن ئىنتايىن ھۇشيار بولۇش توغرىسىدا ئاگاھلاندۇرۇش بەردى.

شىنخۇا ئاگېنتلىقىدا كۆرسىتىلىشىچە، ئۇيغۇر ئاپتونوم رايوننىڭ مۇقىملىقنىڭ ئىنتايىن مۇھىم ئىكەنلىكىنى تەكىتلىگەن جۇ يۈنكاڭ بىخەتەرلىك خىزمىتىنى يەنىمۇ كۈچەيتىپ مەزكۇر رايوننىڭ ئۇزۇن مۇددەتلىك مۇقىملىقىنى قولغا كەلتۈرۈشتە يەرلىك ھۆكۈمەت خادىملىرىنىڭ تېخىمۇ كۆپ خىزمەتلەرنى ئىشلىشى لازىملىقىنى ئوتتۇرىغا قويغان.

جۇ يۈنكاڭ ئۇيغۇر ئىلىدىكى زىيارىتى جەريانىدا ئوتتۇرىغا قويغان مەسىلىلەر ئىچىدە ئالاھىدە دىققەتنى تارتىدىغان بىر تەرەپ، ئۇنىڭ ئۇيغۇر ئېلىدە مىللەت تەۋەلىكىنىڭ قانداق بولۇشىدىن قەتئىي نەزەر، ئۇيغۇر ئىلىدىكى ھەممە ئادەملەرگە تۇرالغۇ ئۆي، سالامەتلىك سۇغۇرتىسى، مائارىپ، خىزمەتكە ئورۇنلاشتۇرۇش ۋە ئەڭ تۆۋەن تۇرمۇش پۇلى قاتارلىقلاردا باراۋەر مۇئامىلە قىلىش ۋە بۇ مەسىلىلەرنى ياخشى بىر تەرەپ قىلىش كېرەكلىكىنى ئوتتۇرىغا قويغانلىقىدۇر.

بۇ ھەقتە ئىنكاس قايتۇرغان دۇنيا ئۇيغۇر قۇرۇلتىيى باياناتچىسى دىلشات رىشىت: "بۇ ئۇيغۇر ئېلىدە خىزمەتكە ئورۇنلىشىش، تۇرالغۇ ئۆيلەرنى تەقسىم قىلىش ۋە باشقا مەنپەتلەردىن ئورتاق بەھرىمان بولۇش جەھەتلەردە، ئۇيغۇر قاتارلىق خىتاي بولمىغان باشقا مىللەتلەرنىڭ چەتكە قېقىلىۋاتقانلىقىدىن ئىبارەت ئۇيغۇر ئېلىدە مەۋجۇت مەسىلىلەرنى بىر خىتاي رەھبىرىنىڭ تەن ئېلىشى بولۇپ ھېسابلىنىدۇ" دېدى.

ئۇ يەنە، مەيلى قايسى دەرىجىلىك خىتاي رەھبىرىنىڭ ئۇيغۇر ئىلىدىكى تەڭسىزلىكلەرنى تەن ئېلىشىدىن قەتئىي نەزەر، ئۇيغۇر ئېلىدە چوڭقۇر يىلتىز تارتقان بۇ خىل ئادالەتسىزلىكلەرنىڭ ئاسان ھەل بولمايدىغانلىقىنى كۆرسەتتى. (جۈمە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.