Қазақистан җумһурийитиниң парламент сайлимида уйғурларму орунға еришти


2007-08-20
Share

Йәкшәнбә күни аяғлашқан қазақистан җумһурийитиниң парламент сайлимида, қазақистанда яшайдиған уйғурларниң вәкилигиму бир орун берилгән болуп, йәрлик кишиләрниң билдүрүшичә, қазақистан җумһурийитиниң парламентида уйғурларға орун берилиши кишини толиму илһамландуридиған иш икән.

Мәлум болушичә, қазақистандики җумһурийәтлик уйғур тиятириниң директори, мәдәнийәт әрбаби мурат әһмиди қазақистандики уйғурларниң вәкили сүпитидә қазақистан парламентидики йүз нәччә орунниң бирсигә еришкән.

Һазир қазақистанда һаят кәчүрүватқан дуня уйғур қурултийиниң муавин рәиси қәһриман ғоҗамбәрдиниң билдүрүшичә, йүздин артуқ парламент әзалириниң ичидә уйғурларға бир орун берилиши, уйғурлар үчүн интайин муһим әһмийәткә игә болуп, буниң қазақистандики уйғурларниң миллий мәнпәәтини қоғдашта роли чоң икән.

Буниңдин бир қанчә ай илгири, қазақистан президенти нурсултан назарбайеф қазақистан асасий қануниға өзгәртиш киргүздиғанлиқни җакарлап, қайтидин сайлам өткүзидиғанлиқини билдүргән һәмдә президентлиқ мөһлитини қисқартиш билән биргә парламентқа аз санлиқ милләтләрниңму өз вәкиллирини киргүзүш салаһийити берилидиғанлиқини җакарлиған иди.

19- Авғуст аяғлашқан қазақистан җумһурийитиниң парламент сайлимида президент нурсултан назарбайефниң партийиси "нур отан" йәни " нурлуқ вәтән" партийиси % 88 аваз билән қазақ парламентида 99 орунға еришкәнликини җакарлиған иди. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт