Мурат насироп үчүн нәзирә өткүзүлди


2007-01-28
Share

Русийиниң "км. Ру" интернет ториниң учуридин қариғанда, русийиниң атақлиқ уйғур композитори вә нахша чолпини мурат насиропниң йәттә нәзириси, москва шәһиридики бир ресторанда 26-январ күни өткүзүлгән. .

Нәзирини мәзкур ресторанниң хоҗайини җүрәт закироп орунлаштурған болуп, буниңға мәрһум мурат насиропниң ханими вә 11 яшлиқ қизи қатнашқан шуниңдәк йәнә москвадики бир қисим атақлиқ сәнәткарлар, мәрһумниң достлири иштирак қилған.

Хәвәрдә ейтилишичә, мурат насироп, һаят вақтида мәзкур ресторанға даим келидикән. У вапат болуштин илгириму мәзкур ресторанда олтуруп, достлири билән муңдашқан икән.

Нәзиригә русийә федератсийисиниң баш муфтиси қатнишип, хәтмә қуран қилған.

Хәвәрдә ейтилишичә, нәзиридә йәнә мурат насиропниң ахирқи уйғурчә иҗадий нахша-музикилири қоюлған болуп, мәрһумниң һаят паалийәтлиригә баһалар берилгән.

Хәвәрдә йезилишичә, мурат насироп 19-январ күни мәзкур ресторанға миллийчә чалғу әсвабини алғили келип, достлири билән қисқа вақит олтурғандин кейин чиқип кетип, шу күни кәчтә өйиниң балконидин чүшүп кетип вапат болған.

Униң алмутадики достлириниң ейтишичә, мурат насиропниң 2-март күн алмутида өткүзүлмәкчи болған нахша кечилики әмәлдин қалдурулмай, мәхсус униңға беғишлинип өткүзүлүш қарар қилинған.

Русийә мәтбуатлири мурат насиропниң зәһәрлик чекимлик тәсиридин өзини өйниң балконидин ташлап өлүвалғанлиқини йезиватқан болсиму, лекин униң аяли вә достлири бу йәкүнгә изчил қошулмай кәлмәктә. Улар муратниң тамака вә зәһәрлик чекимлик чәкмәйдиғанлиқи яки һарақ ичмәйдиғанлиқидин гуваһлиқ берип, буниң "намәлум бир күчниң" тәсиридин келип чиққан сирлиқ һадисә икәнликини оттуриға қоюп, уни ениқлашни тәләп қилмақта.

Русийә мәтбуатлиридин "утро. Ру" интернет торида елан қилинған бир парчә мақалидә мурат насироп өлүп кетиштин бир қанчә саәт илгири униң билән бир сорунда олтурған киристина исимлик бир қизниң муратниң худини йоқитиш характерлиқ зәһәрлик чекимлик маддиси билән зәһәрләнгән болуши мумкинлики һәққидики пәризи оттуриға қоюлған.

Мурат насироп 37 йешида вапат болған болуп, икки пәрзәнти йетим қалған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт