Мурат насиропниң ханими мурат вә уйғурлар һәққидә тохталди


2007-02-04
Share

19-январ күни туюқсиз һәм сирлиқ түрдә қаза қилған русийидики атақлиқ уйғур нахша чолпини, композитор мурат насиропниң рәпиқиси наталийә бойко москвада чиқидиған "һаятлиқ" гезитиниң мухбириниң зияритини қобул қилип, мәхсус түрдә өзиниң мурат насироп билән өткән 15 йиллиқ муһәббәт вә аилә турмушидики шәхсий ишлар һәққидә тохтилип, мурат насиропниң униң һаятидики биринчи вә ахирқи сөйгән муһәббити икәнликини, һаятиниң ахирғичә пәқәр бирла мурат насиропни яхши көрүп өтидиғанлиқини билдүрди.

"Мән әбәдий-әбәд пәқәт муратнила сөйимән" дәп җакарлайду наталийә бойко мухбирға, униң ейтишичә, улар 1992-йили москвадики генәсин намидики музика мәктипидә тонушқан һәмдә биргә оқуған. Әнә шуниңдин етибарән улар арисида күчлүк муһәббәт ялқунлап, җапа-мушәққәттә биргә болуп, оқушни бирликтә пүттүргән. 1996-Йили, уларниң тунҗи пәрзәнти-қизи, 2000-йили оғли туғулған.

Мурат ақ көңүл, мәрт, очуқ-йоруқ йигит болуп, униң достлириниң һәммиси уни наһайити яхши көргән.

"Һаятлиқ" гезитидә елан қилинған сөһбәттә көрситилишичә, наталийә билән муратниң той қилишиға дәсләптә муратниң алмутида турушлуқ ата-аниси қошулмиған болсиму, лекин бара-бара улар мурат билән наталийәниң чоңқур муһәббитини чүшинип, уларни қоллаш қарариға кәлгән һәмдә наталийәгә ислам дини вә уйғурларниң никаһ қаидиси бойичә мурасим өткүзүш тәклипини бәргән. Наталийә буниңға қошулуп, улар мусулманчә никаһ қилған.

Мурат билән наталийә дәсләптә кәчлик кулубларда биргә нахша ейтип, турмуш қамдиған. Кейин, муратниң нами чиққандин кейин, мурат пүтүн имканийити билән аилисини яхши қамдиғандин сирт йәнә наталийәниң нахша чолпини болуши үчүн мәбләғ салған һәм тиришчанлиқ көрсәткән, һәр қетимлиқ консертларда у наталийә билән биргә нахша орундиған. Наталийәниң ейтишичә, мурат униңға уйғурчә нахшиларниму өгәткән болуп, "гүл айим" қатарлиқ уйғур хәлқ нахшилирини көп сәһниләрдә биргә орундиған икән.

Наталийә мухбирға "мурат улуғ хәлқниң оғли" дәп ейтиш билән муратниң өз хәлқини нәқәдәр сөйгәнликини, муратни өстүргән уйғурларниң оттура асиядики әң қәдимий мәдәнийәтлик хәлқләрниң бири икәнликини тәкитләп, өзиниң мурат арқилиқ уйғур хәлқини билгәнлики вә уйғур хәлқини сөйгәнликини изһар қилған. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт