Murat nasiropning xanimi murat we Uyghurlar heqqide toxtaldi

19-Yanwar küni tuyuqsiz hem sirliq türde qaza qilghan rusiyidiki ataqliq Uyghur naxsha cholpini, kompozitor murat nasiropning repiqisi nataliye boyko moskwada chiqidighan "hayatliq" gézitining muxbirining ziyaritini qobul qilip, mexsus türde özining murat nasirop bilen ötken 15 yilliq muhebbet we a'ile turmushidiki shexsiy ishlar heqqide toxtilip, murat nasiropning uning hayatidiki birinchi we axirqi söygen muhebbiti ikenlikini, hayatining axirghiche peqer birla murat nasiropni yaxshi körüp ötidighanliqini bildürdi.

"Men ebediy-ebed peqet muratnila söyimen" dep jakarlaydu nataliye boyko muxbirgha, uning éytishiche, ular 1992-yili moskwadiki génesin namidiki muzika mektipide tonushqan hemde birge oqughan. Ene shuningdin étibaren ular arisida küchlük muhebbet yalqunlap, japa-musheqqette birge bolup, oqushni birlikte püttürgen. 1996-Yili, ularning tunji perzenti-qizi, 2000-yili oghli tughulghan.

Murat aq köngül, mert, ochuq-yoruq yigit bolup, uning dostlirining hemmisi uni nahayiti yaxshi körgen.

"Hayatliq" gézitide élan qilin'ghan söhbette körsitilishiche, nataliye bilen muratning toy qilishigha deslepte muratning almutida turushluq ata-anisi qoshulmighan bolsimu, lékin bara-bara ular murat bilen nataliyening chongqur muhebbitini chüshinip, ularni qollash qararigha kelgen hemde nataliyege islam dini we Uyghurlarning nikah qa'idisi boyiche murasim ötküzüsh teklipini bergen. Nataliye buninggha qoshulup, ular musulmanche nikah qilghan.

Murat bilen nataliye deslepte kechlik kulublarda birge naxsha éytip, turmush qamdighan. Kéyin, muratning nami chiqqandin kéyin, murat pütün imkaniyiti bilen a'ilisini yaxshi qamdighandin sirt yene nataliyening naxsha cholpini bolushi üchün meblegh salghan hem tirishchanliq körsetken, her qétimliq konsértlarda u nataliye bilen birge naxsha orundighan. Nataliyening éytishiche, murat uninggha Uyghurche naxshilarnimu ögetken bolup, "gül ayim" qatarliq Uyghur xelq naxshilirini köp sehnilerde birge orundighan iken.

Nataliye muxbirgha "murat ulugh xelqning oghli" dep éytish bilen muratning öz xelqini neqeder söygenlikini, muratni östürgen Uyghurlarning ottura asiyadiki eng qedimiy medeniyetlik xelqlerning biri ikenlikini tekitlep, özining murat arqiliq Uyghur xelqini bilgenliki we Uyghur xelqini söygenlikini izhar qilghan. (Ümidwar)