Мурат насиропниң делосиниң хуласиси чиқирилди


2007-03-25
Share

20-январ күни москвада туюқсиз түрдә қаза қилған русийиниң атақлиқ уйғур нахшичиси вә композитори мурат насиропниң өлүминиң сәвәби һәққидики икки айдин буян давамлашқан тәкшүрүштин хуласә чиқирилип, мәзкур делониң йепилғанлиқи елан қилинди. Бу һәқтә русийиниң "сәһәр" ториниң бәргән хәвиридин қариғанда, москва тәптиш даирилири муратниң өлүм сириниң наһайити узун вә инчикилик билән тәкшүрүлгәнликини әскәртип, мурат насиропниң өлүмидә һечқандақ җинайи һәрикәтләрниң ипадилири байқалмиғанлиқи, шуңа униң өлүминиң җинайи қилмиш нуқтисидин қаралмиғанлиқини йәкүнлигән.

Тәптиш органлири йәнә шу бурун ейтилғандәк "мурат насиропниң өзини өлтүрүвалғанлиқи" ни хуласилиған болуп, муратниң қаза қилиштин илгири зәһәрлик чекимлик билән зәһәрләнгән болуши вә башқа еһтималлиқларниң һәммиси рәт қилинған, чүнки, муратниң қенидин зәһәрлик чекимлик вә яки һарақ қалдуқлири тепилмиған.

Хәвәргә асасланғанда тәптиш даирилири юқириқи вә башқа әһвалларға асасән муратниң йеқинқи вақитлардин башланған еғир роһий җиддийликтин өзини өлтүрүвалғанлиқ йәкүнини қуввәтлигән.

37 яшлиқ уйғур нахша чолпини мурат насиропниң 20-январ күни москвадики өйиниң балконидин чүшүп кетип туюқсиз қаза қилиши, икки айдин буян русийә мәтбуатлирида түрлүк гуманий инкасларниң елан қилинишиға сәвәб болған. Мәрһумниң аяли, достлири, йеқинлири вә акиси униң өзини өлтүрүвелишиға ишәнмигәм болуп, бу пикирни изчил рәт қилип кәлмәктә.

Мурат насиропниң өлүминиң келип чиқиши һәққидиму түрлүк қияслар оттуриға қоюлған болуп, униң көрүнмәс көләңгүләрниң зиянкәшликигә учриғанлиқи һәққидики пәрәзләрму мәйданға чиққан. Гәрчә, тәптиш даирилири мәзкур өлүм делосиниң ахирқи хуласисини чиқарған болсиму, лекин көзәткүчиләр муратниң өлүминиң йәнила бир сир сүпитидә қеливеридиғанлиқини оттуриға қоюшмақта. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт