Murat nasiropning délosining xulasisi chiqirildi


2007.03.25

20-Yanwar küni moskwada tuyuqsiz türde qaza qilghan rusiyining ataqliq Uyghur naxshichisi we kompozitori murat nasiropning ölümining sewebi heqqidiki ikki aydin buyan dawamlashqan tekshürüshtin xulase chiqirilip, mezkur déloning yépilghanliqi élan qilindi. Bu heqte rusiyining "seher" torining bergen xewiridin qarighanda, moskwa teptish da'iriliri muratning ölüm sirining nahayiti uzun we inchikilik bilen tekshürülgenlikini eskertip, murat nasiropning ölümide héchqandaq jinayi heriketlerning ipadiliri bayqalmighanliqi, shunga uning ölümining jinayi qilmish nuqtisidin qaralmighanliqini yekünligen.

Teptish organliri yene shu burun éytilghandek "murat nasiropning özini öltürüwalghanliqi" ni xulasilighan bolup, muratning qaza qilishtin ilgiri zeherlik chékimlik bilen zeherlen'gen bolushi we bashqa éhtimalliqlarning hemmisi ret qilin'ghan, chünki, muratning qénidin zeherlik chékimlik we yaki haraq qalduqliri tépilmighan.

Xewerge asaslan'ghanda teptish da'iriliri yuqiriqi we bashqa ehwallargha asasen muratning yéqinqi waqitlardin bashlan'ghan éghir rohiy jiddiyliktin özini öltürüwalghanliq yekünini quwwetligen.

37 Yashliq Uyghur naxsha cholpini murat nasiropning 20-yanwar küni moskwadiki öyining balkonidin chüshüp kétip tuyuqsiz qaza qilishi, ikki aydin buyan rusiye metbu'atlirida türlük gumaniy inkaslarning élan qilinishigha seweb bolghan. Merhumning ayali, dostliri, yéqinliri we akisi uning özini öltürüwélishigha ishenmigem bolup, bu pikirni izchil ret qilip kelmekte.

Murat nasiropning ölümining kélip chiqishi heqqidimu türlük qiyaslar otturigha qoyulghan bolup, uning körünmes kölenggülerning ziyankeshlikige uchrighanliqi heqqidiki perezlermu meydan'gha chiqqan. Gerche, teptish da'iriliri mezkur ölüm délosining axirqi xulasisini chiqarghan bolsimu, lékin közetküchiler muratning ölümining yenila bir sir süpitide qéliwéridighanliqini otturigha qoyushmaqta. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.